Vawiin khan Transport changtu Minister Pu John Rotluangliana chuan Aizawl Vanapa Hall bula Transport Directorate Building sak thar a hawng a. Parliamentary Secretary Pu TT Zothansanga pawhin hawnna inkhawm a hmanpui a ni. 

Pu John Rotluangliana chuan Transport Department chu department hrang hrang zingah sawrkar revenue-a sum chhung lut hnem ber pawl a ni, a ti. Mizoram State Transport bus-te hian sum thawh chhuah a hnehin sawrkar sum ti riraltu anga ngai an awm thin nia sawiin Minister chuan MST bus-te hi hlawk tura tlan tir an ni lova. mipui phurrit chhawk zangkhai turin man tlawm taka tlan tir an ni zawk, a ti a. Transport a enkawl chhungin MST bus thar paruk (deluxe 3 leh ordinary 3) lei a, sumo chuan man aia a tlawm zawk avangin thingtlang khaw tam takin MST bus tlan tir an duh a ni, a ti. 

Tranport Minister chuan Chaltlang Transport Office tualzawla consumer petrol pump chu retail outlet a leh tum a ni thu te; Hlimen-a Automated Vehicle Inspection Centre sakna tur sum cheng nuai 1500 chu sawrkar laipuiin a pawm tawh thu te; zu rui chunga motor khalhte endiknan Breath Analyser sawmnga leina tur sawrkar laipuiin a remtihsak thu te; Aizawl Traffic Jam Free a lo puitlin theih nan NEDP hnuaiah Transport Department hmalak nan cheng nuai 500 dah a nih thu te a sawi a. Khawpui tawt lutuk tihziaawm nan Aizawl khawpui daifemah autorickshaw leh Aizawl khawpui chhungah two wheeler taxi tlan tir a ni a, Aizawl khawpui chhung bikah a hun chhungin taxi permit thar pek chhuah a ni lo, a ti bawk. Pu John Rotluangliana chuan khawpui chhung mai ni lo, Aizawl District chhunga khaw awm zawng zawng enkawltu Aizawl DTO office chu indaihlohna a nasat avangin thingtlang khuate enkawltu tur DTO (Rural) siam tuma chak taka hmalak mek a ni, a ti a. Khawpui lai liah Transport Directorate building tha tak sak zawh a ni chu lawmawm tiin a enkawl zui hna chu a neitute mawhphurhna a nih hriaa fai taka enkawl chhunzawm turin a chah bawk a ni. 

He huna thusawitu dang Parliamentary Secretary Pu TT Zothansanga chuan thawktute fuihin an eizawnna hna taima taka an thawh hi mipui leh sawrkar tan malsawmna a ni, a ti a. Sawrkar sum thawkchhuaktu department an nih angin mahni mawhphurhna hrechianga, mipui sum riral lohna turin rinawm taka thawk tur leh tih tur tih loh avanga sawrkarin sum a lakluh tur tam tak a chan theihzia hriaa fimkhur taka hna thawk thin turin a fuih a ni. 

Transport Department hi kum 1972 ah Supply and Transport Department tia ding tanin kum 1985 khan tuna an sak that tak Directorate building awmna hmunah hian Joint Director hovin an thu a. Directorate hranga a din hnuah pawh engemawchen helai hmunah awmin kum 2005 khan  Disater Management-in a him tawk tawh lo nia hriain thiat turin hriattir a. Chaltlang Inter State Terminal (IST) hmunah an insawn cho ta a. Directorate building sak that nana sum ruahman hmasa ber chu cheng nuai 393.3 niin a sak pum nan cheng nuai 133.72 chu sawrkarin a pek belh a ni. 

Inkhawm hi Transport Secretary Pu Lalthangpuia Sailo chuan a kaihruai a, Director Pu R.Remmawia’n report pe in Jt.Director Er. R.Lalrammawia chuan lawmthu sawiin inkhawm tihtawp a ni.