Vawiin chawhnu dar 2:00 Pm hian Chief Minister Pu Lalthanhawla chuan Lai Autonomous District Council Chief Executive Member Office Building thar a hawng.

LADC CEM Building thar hawnna inkhawmah hian thusawiin Chief Minister chuan tun hnaiah Autonomous District Council ten hmuh theihin hma an sawn a, kum sawm kalta leh tuna inhmun hma dinhmunte chu a inthlauvin a inchangkan hleih ta hle a. Heng Office hmunhma tha zawk hian hna tha zawk leh chak zawka thawh theihna a pek ngei che u ka beisei a ni a ti. Vawiinah pawh Building thar nalh tak mai kan hawnga, heng kan hmunhma mawi leh nalh tak takte hi kuva, chinai leh meizial bung tea kan tibawlhhlawh leh si a nih chuan a pawi dawn a, he CEM Office thar hi faina inzirtirna hmun thar lo ni nghal bawk se a duhawm hle a ni a ti.

Kan rama Cancer natna leh Nausen thihna tam lutuk a ngaimawh thu sawiin Chief Minister chuan, hetiang dinhmun thalo taka min din tirtu chu zuk leh hmuam leh faina kawnga kan hnufual vang nia a hriat thu sawiin Pathian chenna in kan nih ang ngeia kan thianghlim a tul tak zeta ziak leh chhiar thiam tamna state ni chung phei chuan kan dinhmun hi a inhmehlo hle a ni a ti. Taksa a thianghlim ang bawkin kan rilru pawh a thianghlim tur a ni a, ram inrelbawlna kawnga Pathian khawngaihna avanga dinhmun thaa kan awm changte hian min hlangkaitu Pathian duhdana hnathawka, mahni laina leh hnaivaite duhsak nana hmang mai tur kan ni lo a ni. Mahni hnaah kan tui tur a ni a, mahni hna a tuilo, hlawh hmuh nan chauhva duh kan awm thin avangte in hmasawnna hna thawh a thuanawp thin a ni a ti bawk.

Mizoramah hian tumah hnam hnufual bikte, hmun kilkhawr bika cheng emaw hnuchhawn bik emaw kan awm lova, hmar lam a ni emaw chhim lam a ni emaw tute mah ‘bik’ kan awm lo. Kan za in dinhmun intluk, chanvo in ang leh mawhphurhna inchen vek changtute kan ni a. Lalpa zawnchhuah ram, sakhaw lian tak tak pathum Buddhist, Muslim leh Hindu hote hnena a rawngbawl tura a thlan hnam kan nih avangin intodelh kan mamawh a, hlawk taka Lalpa rawng bawl turin kan sum leh pai dinhmun a tha tur a ni. Chumi thleng tur chuan kan za hian chanvo inang kan chang theuh a ni a ti.

Ram intodelh kan nih theihna tura NLUP hmanga sawrkar hmalakna sawiin, NLUP tunlai khawvel hmasawnna in a mamawh ang zawng zawng keng tel, kan tuihna kam zel venna turte, khaw lum chak lutuk venna turte leh kan tu leh fate thlenga chenna tlak ram siam tura mamawh awmna Policy a nih avangin a hlawhtlin theih nan theih tawp kan chhuah theuh tur ani a ti bawk.

Hmasawnna hnathawh hrang hrangte tarlangin Chief Minister hian 60 Mw siamchhuahna tur Tuirial HEP chu kum 2015 a hawn a nih tur thu a sawi a, kumin a hawn hman tur Bairabi leh Sairang inkar rel kawng chu kut tling lova sum lakluh tum mi engemawzahte avangin a hawn hun tur pawh sawi theih a nih tawh loh thu a sawi bakah, 610 Mw siam chhuak thei tur Kolodyne HEP pawh diklo taka zangnadawmna dawn tumte avangin hna a chak thei lo hle a ni a ti bawk. Heng bakah hian World bank sum hmanga Lunglei to Tlabung leh Tlabung to Kawngpuichhuah kawng turte, Zokhawthar atanga Falam thlenga India sawrkar sum a kawng laih a nih tur thute, Keifang leh Meidumah Natural Gas laihchhuah hna tan thuai a nih tur thute a tarlang bawk.

Vawiina CEM Office thar hawnna inkhawm hi LADC CEM Pu V. Zirsanga’n a kaihruai a, a ni hian inlawmna thu sawiin Chief Minister hnenah hian LADC hminngin Memorundum pahnih Lawngtlai to Lungpher kawng chungchang leh, Lunglei to Lawngtlai kawng BRTF hnena hlan letleh dilna chung chang a thehlut bawk.

Vawiin a CEM Office thar hawn tak hi 13th Finance Commission atanga sak a ni a, cheng nuai 211 senna tura ruahman niin tunah hian luah theiha zawh fel a ni tawh a ni.