Mara Autonomous District Council (MADC), Lai Autonomous District Council (LADC) leh Chakma Autonomous District Council (CADC) a constituency pali ah te June ni 4, 2014 hian By-Election neih a nih tur thu vawiin tlai dar 4 khan Pu H.Darzika, Secretary, State Election Commission (SEC), Mizoram chuan a pisaah a puang. Dr.Buddha Dhan Chakma chhuahsan tak 2-Borapansury-II, Pu C.Ngunlianchunga chhuahsan 10-Lawngtlai Bazar, Pu J.H.Lallianngura a boral tak avanga member thar thlan ngaihna 24-Tuithumhnar leh Pu Hiphei chhuahsan tak 11-Tuipang II ah te inthlan hi neih tur a ni.
State Election Commission (SEC) chuan he inthlan atana Notification chu naktukah a tichhuak dawn a. Inthlan chuh tumte tan 21.5.2014, tlai dar 3 thleng hming pek luh theih a ni. Hming pek luhte hi 21.5.2014 chawhnu dar thum hnulam atangin endik tan a ni ang a, inhnukdawh duhte tan 22.5.2014 tlai dar 3 thleng hun hawnsak an ni ang. Inthlan chu 4.6.2014, zing dar 7 atanga tlai dar 5 thleng neih tur a ni a. Inthlan that (re-poll) ngai a awm a nih chuan a tuk June ni 5 ah re-poll neih a ni ang. June ni 6, Ningani zing dar 10 atangin vote tla te chhiar a ni ang.
By-Election buatsaihna tur Constituency paliah te hian polling station 15 a awm a, vote nei thei mipa 3171, hmeichhia 3394 an vaiin mi 6565 an awm. He inthlan atan hian Observer 2 ruat an ni a. Dan leh thupek kenkawh kawngah mawhphurtu ten a tul angin hma an la ang a, venhimna uluk zual ngai bik Sensitive Polling Station erawh a awm lo.
Model Code of Conduct chu inthlan puan ni vawiin May ni 12, 2014 tlai dar 4 atang hian Saiha leh Lawngtlai District huam chhungah hman tan nghal a ni.
SEC chuan he By-Election ah hian voters-te chu ram danpuiin chanvo pawimawh a pek an vote hlu tak thlak vek turin a sawm a. Inthlanna felfai leh muanawm neih a nih theih nan inthlanna buaipuitute, Political Parties, Media, tlawmngaipawlte leh mipui tawiawmna a ngen a ni.
He inthlan chungchanga mipuite hriat tur pawimawh chu SEC website www.secmizoram.in ah tarlan a ni a, hemi bakah thil hriatfiah duh leh zawh duh neite chuan SEC e-mail id : sec_mizoram@yahoo.com ah leh phone number 9612589755/ 9436317177/ 7308188001 ah te zawhfiah theih a ni ang.
