Nimin chawhnu khan Chief Minister Pu Lal Thanhawla chuan Dilkhan khaw khelmualah Chalfilh Constituency chhunga sawrkar hmachawp leh hmalakna hrang hrangte hawnna leh tlangzarhna hun a hmanpui. 

Dilkhan khaw khelmualah Chalfilh bialchhung mipuite hnenah thu sawiin Chief Minister Pu Lal Thanhawla chuan bialchhung hmasawnna tur in MLA chak a pawimawh rualin bialchhung khaw mipuite  leh khawtlang hruaitute tawiawmna a pawimawh tel a ni a ti a. Zoram mipuite chu mawhphurhna inchen vekin hna hniam ber atanga hna sang ber thawk zawng zawngte pawh, an chenna leh a chhevel ti hmasawn tura rawngbawltute vek an nih thu a sawi a. Mizoram mipui zinga tam ber kuthnathawktute chawikan leh an lam tang sawrkar hmalakna lian zawk siam zel chu sawrkar thil tum a ni a ti. 

"Kan VIP te tia kan koh, kuthnathawktute hian an khawbuzawlah thlamuang taka ei an hmuh a, an intodelh leh midang tlawn ngai lova ei an hmuh hi kan duh ber a. Anni an hlim loh chuan Zoram a nuam ngai dawnlo a ni", a ti a. Kawngtinrengah  Mizoram tihhmsawn tum a nih thu sawiin hun reiloteah Mizoram chu Sumdawnna luh/chhuahkapui "Gateway for trade and commerce with South East Asian Countries" a la ni dawn tih a sawi a. Bangladesh leh Myanmar te pawh Mizoram mipui te aimah in an phur tawh a. Inpuahchah nan kawngpuiah te leh Power/ kawlphetha siam kawngah te chak taka hmalak mek a ni a ti a. Hemi kawnga inpuahchah nan Tuirial Hydel Project hunreiloteah hawn beisei a nih thu leh Vankal daiah  MW 20 pechhuak thei Solar Plant buatsaih mek a nih bakah Thenzawlah MW 10 siamchhuak thei Solar Plant siam tura hmalakna te a tarlang a. Kawlphetha siamchhuah kawnga state enkawl theih chin chu MW 5 atanga MW 25 ah tihsan anih angin MW 42 siamchhuak thei ni mahse, Tuirini pawh state in a enkawl theihnan,  MW 25 pechhuak tura khuah tum mek leh Mizoram sawkar phei chu phalna a hmuh ruala thawk turin a inpeih tawh thu a sawi a ni. 

Chief Minister chuan Zoram mipui te chu a Zawngchhuaktu in khawvela hmun nuamber, remchang ber leh thlai chitinreng that theihna hmunah a dah niin a sawi a. Zoram mipui te chuan an mihring pui te hnena Chanchintha hril mai a tawk lo tih an hriata,  thilsiam zawng zawng te hnenah pawh Chanchin tha an hril a ngai a ti a. Chu chuan ramngaw leh nungcha humhalh kawngah thil nasa tak a ti thei ngei a ti a. NLUP pawh chutiang behchhana siam, mi reithei, pachhia hmeithai leh tanpui ngai te khaichhuahna a nih piahlamah ramngaw leh nungcha humhalhna kawnga hmalakna te thlengin a ni tel nghal a ti. 

Chalfilh bialtu MLA Dr.Ngurdingliana, MAMCO Chairman chuan Chalfilh bial chu tunhma lamah hmasawnna awm tlemna hmun anga thang thin ni mahse tunah chuan nasa takin hma a sawn tawha 'Hmarthimpui' a ni tawh lo a ti.Bialtu MLA a nih anga hmachhawp pathum - hriselna, zirna leh kawngpui a bialchhung tih hmasawnna kawnga a in siam chu Mizoram sawrkar leh bial mipuite taihmakna zarah tihhlawhtlin mek a ni a ti a. Ramngaw humhalh kawngah te zirna kawnga hmasawnna leh ei leh bar kawnga intodelhna kawngah thawhchhuah tam zawk nei tur leh an theih tawp chhuah turin Chalfilh bial mipui ten ke an pen mek a ni a ti.Dr. Ngurdingliana chuan bial chhunga sawrkar hmachawp hrang hrang te a tarlang a. Chung zingah chuan Dilkhan khua a NEDP kaltlanga Warehouse - Food Processing Unit din tur, Bial chhunga kawngpui laih tur, blacktopping tih zawh tawh leh tih mek te, Manipur pawhna tur kawng siam tura hmalakna tur, Zirtirtu indaihlohna phuhruk leh zirlai result tha te, pawl 11 leh 12 zirna tur Phuaibuang, Suangpuilawn leh Sesawng a hawn te, Tui intur thianghlim chhawpchhuah kawnga hmasawnna te leh hriselna kawnga hmasawnna te a tel a ni. 

PWD Roads Chief Engineer Pu John Rammawia Report pek dan chuan Chalfilh bial chhungah hian PMGSY Scheme hnuaiah kawngpui Km 65 a thui chu Rs.4900.72 lakh seng in Blacktopping mek a ni a. PMGSY hnuaiah tho, thal a nih veleh a kawngpui siam tur Km 48.84, Rs 3544.53 lakh senna tur pawh  work order pekchhuah tawh a ni a. PMGSY hnuaiah tho hian Rs 747.63 lakh senna tur kawngpui Km 10.08 siam hna chu thawh tura buatsaih mek a ni bawk. Heng bakah hian state plan fund, National highways hnuai, NEDP, NABARD leh NEC hnuaia hmalakna te a la awm a. A pumpuiah Chalfilh bial chhunga kawngpui siam nan Rs 9203 Lakh zet pek lakchhuah a ni tawh a, Rs.747 lakh  leh hmalakna dang tuam nan la sen belh a ni dawn a ni. 

Chalfilh bial chhunga PWD hnuaia sawrkar hmalakna hrang hrang hawnna inkhawm hi Saitual SDO Civil Pu R.Vanlalsawma'n a kaihruaia. PWD Roads Chief Engineer Pu John Rammawia'n Technical Report pe in hnathawh dan tur, hmalak mek leh hnathawh tawh chin te a tarlang a. NIB Vice Chairman Pu PL Thanga, State Planning Board Member& Secretary ni bawk in thusawina hun a hmang a. PWD E-in-C Pu R.Vanlaltluanga, PWD CE Pu Lalrintluanga leh sawrkar mi pawimawh te an tel a. He hunah hian   Chief Minister Pu Lal Thanhawla chuan Dilkhan khaw mipui te chu an khaw intodelhna tur thil tangkai ngaihtuah chhuak tur leh an hmalakna tur duanchhuah  chu lo enchian a,  lo tanpui pawh a inhuam thu a hriattir a ni.