Chief Minister Pu Lal Thanhawla chuan vawiin chawhnu khan Champhai Chhangphut Field-ah Rii and Hawla Inter-Village Football Tournament 14-na Final hmanpuiin, Trophy a hlan. Chief Minister hi Sports & Youth Services Minister Pu Zodintluanga leh Parliamenatary Secretary Pu TT Zothansanga ten an tawiawm a ni.

Chief Minister chuan thu sawiin, infiammi hlawhtling ni tur chuan taimak bakah insumtheihna, nun uluk leh hnamdang tawng thiam a pawimawh a ni, a ti. Mizoram Sorkar in Mizo thalai tana hma a lakna hrang hrang tarlangin, ram mipui 50% aia tam chu thalai an ni a; zirna lamah te, infiamna lamah leh thiamthil dang hrang hrangah eizawnna an hmuh theih nan Sorkar chuan training pe in, thalai hman tlak, 'export quality' ah tam thei ang ber Mizo thalai te hi Sorkarin siam a tum thu a sawi a. A bik takin infiamna lamah discipline hrang hrangah Sorkarin tan a lak nasat thu leh, infiamna hmunhma ah phei chuan Mizoram chu India rama nei tha pawl anih thu te, football ah phei chuan "football factory of India" tia phuah theih khawpin kan thleng sang tawh a ni, a ti a. Football hi eizawnna mai nilovin hausakna tham ani thei a. Chumi tur chuan nun uluk a, hrilselna kawng zawh a zuk leh hmuamah te insum thiam a tul a ni tiin, hmasawnna kawng zawha ram pawn a khel thei tur phei chuan tawng lamah nasa zawka hma sawn a ngai a ni, a ti bawk.

Chief Minister chuan Sorkar hmalakna dang tarlangin, Champhai khawchhunga mirethei mahni a in sa theilo te tan Pradhan Mantri Awas Yojana - Housing for All hmalakna, UD&PA  hnuaiah chenna in sak sak an nih tur thu a puang a. Hemi kalpuinaah hian khawtlang hruaitute chu dik taka hmala turin leh, duhsakna avanga a mamawhlo te dah luh tum am awm tur anihloh thu a tarlang a. Swachh Bharat pawh ngaipawhmawh anih thu tarlangin, panchayati raj inrelbawlna hnuaiah chuan mahni chenna in a inthiarna nei tan chauh in candidate phal anih theih nan hmalak mek a nih thu te a tarlang a. Heng hmalakna zawng zawngah hian mipuiten Sorkar tihsak hun nghak lova intodelh tumna rilru pu in mahni tih ve theih chin chu thawh ve nachang kan zir a tul a ni, CM Pu Lal Thanhawla chuan a ti a ni.

Village Council 32 inelna Football Tournament, Champhai District Football Association (CDFA) buatsaih hi April ni 12 khan Home Minister in a hawng a. Final match hi Zotlang leh Khawzawl-II ten an khel a. Champion team hian trophy leh pawisafai Rs. 1,00,000 an dawng a, runner-up in Trophy leh pawisafai Rs. 50,000 an dawng thung. An ni bakah hian Fair Play Award Rs. 10,000, Loser of Semi-Final Rs. 5000 ve ve, Best Player Rs. 1000, Top Scorer Rs. 1000 leh Beat Referee Rs. 1000 pek a ni bawk.

Vawiin hian entry ticket atanga 30% leh inkhel en te atanga charity donation khawn atang tlingkhawm chu Mamit a pa eisual vanga a chhungten an boral san vek naupang Miriam Lalremruati tanpui nan CDFA chuan pe dawn a ni.