Lunglei DC leh District Anti-Tobacco Squad Chairman ni bawk Pu Abhijit Vijay Chaudhari chuan vawiin khan Lunglei khawchhunga media-te ama pisaah kokhawmin Anti-Tobacco Squad hmalaknate leh COTPA hnuaia vaihlo kaihhnawih chungchanga Dan-in a phalloh thilte a sawipui.

Pu Abhijit Vijay Chaudhari chuan GATS-India Tobacco User Survey (2009-10) ah khan Mizoram chu zuk leh hmuam tih tamna ber state (67pc) a ni a; rampumah mipa leh hmeichhia cancer natna veiah pawh Mizoram chu a sang filawr lak avangin Anti-Tobacco Squad-te chuan nasa lehzuala tanlak an tum thu leh mipuite vaihhlo/zuk leh hmuam hawisan tura inzirtirna kawngah media-te thawpuina leh tanpuina an mamawh thu a sawi a. Kumtin Mizoramah meizu miten Cigarette an leina belhkhawm chu Rs.22,97,60,000/- a tlingkhawm a, hemi piah lamah cancer an vei chuan an inenkawlna lamah sum tam tak an khawhral thin a ni, a ti.

Lunglei District Nodal Officer, NTCP Dr.S.R.Ngurchamliana pawhin thusawiin rampumah vaihhlo leh a kaihhnawih thil titlem turin sorkar laipui chuan theihtawpin tan a la mek a, COTPA Dan pawh kum 2003 atang khan khauh takin a kalpui a ni, a ti a. vawi leh khatah vaihhlo leh a kaihhnawih chu tih tawp emaw khap emaw a thei lo tih hriain fimkhur taka mipuite hrilhhriat a, zuk leh hmuam atanga an fihlim chho zel turin hmalak mek a ni, a ti bawk. Rampumah Mizoram State chiahin District tinah Tobacco Cessation Clinic a hawng, hetah hian zuk leh hmuam nghei duhte tan tanpui turin staff dah vek an ni bawk tih a sawi a. Anti Tobacco Squad ten COTPA hnuaia an mi mante chungchang ngaihtuahtu tur Magistrate pawh ruat thuai beisei a ni, a ti.

COTPA hian mipui punkhawmna hmuna meizuk leh vaihhlo kaihhnawih thil tih a khap tlat a, kohhran hmun leh hall bakah public transport (Maxi cab, taxi, auto rickshaw, etc) chhungah te pawhin meizul leh vaihhlo kaihhnawih thil tih phal a ni lova; ti lui an awm a nih chuan (driver/passenger) Anti-Tobacco Squad te hnenah complaint phone emaw ziakin emaw thehluh theih a ni. COTPA Dan chuan zirna ina atanga 300 ft. aia hnaiah vaihhlo leh a kaihhnawih zawrh a phal lova, zuar lui te chu Danin a phal angin pawisa chawi tir emaw jail-ah tan tir theih a ni.