Champhai a cham mek Chief Minister Pu Lal Thanhawla chuan vawiin khan Champhai a Sorkar Office-a hotute DC Conference Hall, Keifangtlangah kawmna hun hmangin, langtlang taka hnathawk turin leh mipui tan dawr nuam ni turin a chah.Chief Minister hi UD&PA, SYS etc. Minister Pu Zodintluanga leh Parliamentary Secretary leh Champhai North bialtu MLA Pu TT Zothansanga ten an tawiawm a ni.

Chief Minister chuan kan hnathawhnaah midangte tan malsawmna kan ni tur a ni, tiin intihlal leh induhna rilru put a thiang lova, min dawr tura kan pisa theuhva lo kal apiang chu tha taka lo dawngsawngin, dawr nuam takin kan awm tur ani a ti a. MLA te hi mipui vantlang chhiahhlawh kan nih angin sorkar hnathawkte pawh sorkar chhiahhlawh an ni a, inngaihtlawmna rilru pu in hna kan thawk thin tur a ni, a ti. Sorkar sum kawngbo hi hmasawnna daltu lian tak a nih avangin sorkar hnathawkte chu an hnaah rinawm taka thawkin, sum lo kal chu a hmanna tur dik takah an hmang tur ani a ti a. Mahni hnaah hmathlir tha leh thahnemngaihna tak tak neih a pawimawh thu CM chuan sawiin, tun thleng hian Sorkar laipuiin state harsa zawkte puibawm turin a inhawng a, chumi inhuamna chu umzui a hmasawnna atan hman tangkaia, sum haichhuak thiam turin Sorkar Officer-te tan lak a tul thu a sawi a. Budgetary system-te pawh zir a engemaw chen hriat ve zel tur ani, tiin CM chuan Faina leh thianghlima kawngah leh zuk leh hmuam thilah Dan zawm turin mahni pisa theuh vawng turin kalkhawmte chu a chah bawk.

CM chuan kan sum dinhmun hi kan siamhtha hret hret a, kan neih ang chhun hi anihna tur taka kan hman chuan keini ang state te leh mipui tlem tan chuan a thahnem tawk viau ani, a ti a. Kan sum lakluh mil zela khawsak kan thiam a pawimawh tih kan hriat a tul ani, a ti a. Kuttlinglova sum lakluh duhna vanga compensation dilna hian project lian tak tak kan neihte a tikhaihlak mai nilovin a tithuanawp fo a, chuvangin rinawmna, dikna, taimakna, takna leh Pathian tihna nung kan neih a pawimawh hle a ni, a ti.

Mizoram hmasawnna zel turah hian District tinte hi an pawimawh thu sawiin, district tina inrelbawlna tha a awm chuan state inrelbawlna a khalh ngil theih tur a sawi a. Champhai District chu India leh Myanmar inkar insumdawntawnna a taka neih anih hunah chuan a rah seng hmasa tur anih thu sawiin, chuvang chuan District mipuite rilru pawh hetiang lam hawia inhawn lawk thiam a pawimawh hle ani, a ti.

CM Pu Lal Thanhawla chuan New Land Use Policy hmalakna in miretheite rahbi tleu tawhte tana eizawnna kawng siamsak anih bakah tunlai khawvelin a buaipui ber sik leh sa siamthat leh ramngaw humhalh te a keng tel a, ramdang atangin university leh company-te bakah United Nations thlengin Sorkar sawm hmasak pawh nilovin ngaihven a hlawh phah ani, a ti.

UD&PA Minister Pu Zodintluanga pawhin thu sawiin, kan hnathawhna ah hma kan sawn theih nan sorkar hnathawkte chu in update a inzir zawm zel a pawimawh thu sawiin, thawhhona tha nei tur chuan inhmuhkhawm tam te a that thu a sawi a. Langtlang taka hna thawh chuan department chhungah ringawt pawh thawhhona a that phah thin a ni, a ti a. Kan hna theuh ah tui taka kan thawh chuan hmasawnna a awm ngei thin a, mipuiin an chhawr tak tak theih tur hna rintlak siam tum tur a ni, a ti bawk.

Parliamentary Secretary Pu TT Zothansanga pawhin thu sawiin, Champhai a sorkar hnathawkte chu an hnaa thahnemngai tak an ni chu lawmawm a tih tyhu sawiin, thawhhona tha tak nei zel turin a chah a ni.

Vawiin CM hova meeting hi Champhai DC Pu Vanlalngaihsakan kaihruaiin, officer ten an department theuhva hmalakna te leh harstana te thlen in sawihona hun hman a ni a. Head of Office-te an tel kim hle a ni.