Industries Minister Pu H. Rohluna chuan vawiin khan Lengte a Iron Rod siamna Mizoram ISPAT Industry a tlawh a,hemi hnu hian Bamboo Technology Park, Sairang a tlawh leh bawk a. Minister hi Parliamentary Secretary Pu Joseph Lalhimpuia leh Industries Commisioner Pu ZothanKhuma leh Industries Department Official ten an tawiawm a ni.

Pu H. Rohluna chuan ISPAT Industry in mumal taka Iron siamna changtlung tak an kalpui mek chu lawmawm a tih thu sawiin, Mizoram ngei ah in sakna bungrua awlsam taka lak theih a ni chu lawmawm a tih thu a sawi bawk.

Mizoram ISPAT Industry ah hian kum 2012 atang khan Iron rod hi siam chhuah tan a ni a, tunah hian thla tin metric tonne 800 siam chhuah niin hetiang zat hi hralh chhuah leh nghal ziah a ni. Iron Rod siam nan hian TATA Steel Jamshedpur atanga thir an lak bakah Mizoram-a thirchhia metric tonne 100-150 vel thla tin an lei thin a ni. Iron Rod an siam chhuah te hian ISO marking an nei vek a ni a.Lengte khaw rama EPIP huam chhunga awm, Mizoram Ispat Industry-ah hian thawktu mi 100 vel an awm mek a, heng zinga 40 te hi Mizo thalai te an ni.

ISPAT Factory hi a dung metre 300, a vang metre 60 a ni. Kum 2010 April-ah Industry Department-ah dilna an thehlut a, 2010 December khan Rs. Nuai 15 sengin lease allotment pek an ni. Kum tin a hmun hawh manah Rs. Nuai 1.8 an chawi, P&E hnenah power security Rs. Nuai 65 an pe a. NEDFI leh SBI, Guwahati atangin loan cheng vaibelchhe 20 an la niin an in sawi.