Pu Lal Thanzara, Health & Family Welfare Minister chuan vawiin khan Aijal Club ah Mizoram Govt. Doctors’ Association khawmpui vawi 33 na a hmanpui a, chawhma inkhawm hi Dr. T. Lalzawmliana, Asst. General Secretary in a kaihruai a ni.

Pu Lal Thanzara chuan Doctor hna hi mihring nunna chunga rawngbawlna, hna zahawm leh in thlahdah taka thawh chi miah loh, nun uluk ngai tak hna anih avang hian, in hna hi mipui mimir in an ngaihsan leh an zah em em a ni a, chuvangin zuk leh hmuam leh, ruihtheih thil laka fihlim tura ngaih in ni a, hmanlai atangin tun hun thleng pawh hian in nihna hi Pathian rawngbawl nan pawh tangkai leh Pathian pawh in a hman em em profession a ni, a ti a. Aizawl khawpuiah mahni inlum atanga kan hnate hi thawh tum tlat, transfer dawna tan chi tin renga tan la eng emaw zat an awm laia, MO leh Specialists thenkhat posting place a thuawih tak leh lungawi tak leh tha taka awmte chungah lawmthu Minister hian a sawi a ni.

Minister chuan IMA / MGDA te’n hmun kilkhawr zawka Special Clinic an ruahman thin hi a lawmawm tiin mipui tan malsawmna an ni a, chhunzawm zel turin a ngen nghal a. Doctor indaih lohna phuhruk turin State quota a MBBS/PG zirte tan an zir zawha Sawrkarin a mamawh dan a zira kum 2 tal Sawrkara thawk tawh thin turin intiam kamna neih tir thin an ni tawh dawn a ni tih thu sawiin, NHM hnuaiah Sawrkarin duh anga Doctor hna pek theih anih loh laia, tlawmngaih chhuaha MBBS pass tharte rawih tur an hmu leh zauh thin hi thil lawmawm tak a ni in, indaih lohna pawh nasa takin a chhawk zang khai mek a ni bawk.

Pu Lal Thanzara chuan mipui zangkaina tur lam ngaipawimawh in Private Practice lamah doctor thiamte hian mipui hmangaia chintawk neih theih a tha a tih thu leh Hospital lama an duty hour bawhchhia a private practice nana hmante hi a thiang lo a ni tih hi hriain helamah hian insum hram hram thin turin a chah a. Damlo zai ngaite pawh hi a theih hram chuan an harsatna te hriatpui a, private hospital niloah hian zai tum hram hram turin leh Test chi hrang hrang duhna bik neihte pawh hian mipui tan phurrit a siam thei a ni tih hre turin a chah bawk.

Doctor te chu Damlo damdawi chawh kawngah pawh duhtui tura chahin Damdawi tha, a quality tha, company tha, damlo tan pawha effective ngei a ni tih in hriat chian, an fate leh an chhungte damlo tan pawha an chawh duh tur ngei chauh damlote chawh thin zel turn Minister chuan a chah a. Office work, paper work, reports and records nen mihring damlo history nen, treatment, diognosis, prognosis, management nen thawh tur tam tak karah damlo lungawina tur mental, spiritual leh physical care pek tel an ngai tih i hre reng zel turin a chah bawk a ni.

Doctor tam zawk neih theih nan te, nurse leh health worker tam zawk neih theih nante a hmalak mek reng anih thu sawiin Minister chuan Medical College pawh neih ngei theih nan theihtawp chhuah mek zel a ni a ti.

Vawiin khawmpui ah hian Pensioners 5 - Dr. Sangthuama Ngente, Dr. Lalsiampara, Dr. Chawngthansiami, Dr. Lalbiakkima leh Dr. Vanlalhruaii thlahna hun hman a ni a. MGDA member thi ta 2 - Dr. Zaihmingthanga Fanai leh Dr. J. Zolawmzuala sunna hun hman a ni bawk.

Chawhnu lamah rorel inkhawm neih a ni a. Hetah hian Inter-Se-seniority chungchang te, transfer and posting norms chungchangte bakah thu pawimawh hrang hrangte rel a ni.