Sawrkar Laipui Flagship Programme "Pradhan Mantri Awas Yojana / Housing For All" Serchhip khawpuia kalpui dan tur chungchang sawihona leh inhrilhfiahna hun vawiin khan Serchhip DLAO Conference Hall-ah neih a ni a, District Bawrhsap Dr. Lalrozama, IAS chuan he hun hi hmanpuiin Serchhip khawpui huamchhunga Local Bodies hrang hrang hruaitute an tel a ni.

District Bawrhsap chuan khawtlang tana roreltu thlanchhuah kalkhawmte hma ah thu sawiin "Housing For All" scheme Sawrkar Laipuiin a rawn duang chhuak chu thil lawmawm tak anih rualin chona lian tak a ni tel a ni a ti a, Sawrkal Laipuiin Mizoram chu model project atana hman a tum avangin dik tak leh felfai taka hlawhtling tura beih a ngai dawn a, hemi tur hian a scheme hi kan hriat bel a ngai dawn ani a ti a, Serchhip khawchhunga hmasawnna tur, in leh lo neilo te inbenbelna tur ruahmanna anih vangin tanpuina dawngturte thlanchhuah chungchangah pawh dikna lal ber se a duh thu a sawi a, hetiang ruahmanna a rawn thlen hian thil a buai nuai nuai duh thin khawp a, tuten emaw mahni tanghma hai ran a kua an hreuh thin avang te hian a hlawhtlin tur angin kan hlawhtling lo fo thin a, hetiang hlemhletna laka fihlim tlang tur leh tanpuina chu a mamawh tak tak leh a phu ngei ten dawng ngei se a duh thu a sawi a ni.

Sawrkar Laipuia  Ministry of  Housing and Poverty Allevation hnuaia Housing For all Scheme  hi Prime Minister Narendra Modi hova ruahman niin India zalenna hmuh atanga kum 75 na, kum 2022 ral hma a India ram chhung khawpui (Urban Areas) hrang hrang a chenna In neilo zawng zawng ten chenna In an neih theuh theihna tur atana ruahmanna thar niin ni June ni 25, 2015 atanga hman tan a ni a, "Pradhan Mantri Awas Yojana (PMAY) / Housing For All by 2022" ti a a hming vuah a ni.  

"Pradhan Mantri Awas Yojana (PMAY) / Housing For All by 2022" hnuaiah hian scheme hrang hrang awmin Mizorama chuan scheme pahnih Credit-Linked Subsidy Scheme (CLSS) leh Beneficiary-led Construction (BLC) kalpui ani dawn a, Mizoram chhunga khua (census town) 23 tuam chhuah tur a ruahman a ni."Housing For All" hnuaiah hian chenna In nuai 2000 India ram pumah sak tum a ni aheng zinga 27,000 chu Mizorama sak tur a ni. Mizoramah hian Beneficiary-led Construction (BLC) hnuaiah In 20000 sak tura ruahman niin heng zinga 420 chu Serchhip District a khaw pathum Serchhip, Thenzawl leh North Vanlaiphaiah sak tura ruahman a ni a, Credit-Linked Subsidy Scheme (CLSS) hnuaia Mizorama In sak tur 7000 zinga 1013 chu Serchhip District a heng khaw pathumah te hian sak a ni bawk ang.

Serchhip District ah bik chuan kum 2020 ah heng target te hi zawhfel vek tum a ni a, kuminah hian Serchhip khawchhungah Beneficiary-led Construction (BLC) kaltlangin In 60 leh Credit-Linked Subsidy Scheme (CLSS) kaltlangin In 260 sak tum a ni.

Credit-Linked Subsidy Scheme (CLSS) tanpuina dawng theite chu chhungkua chenna In neilo, kum khata Rs. nuai 6 la lut tling lo an ni tur a ni a, loan hi Rs. nuai 6 thleng a pung tlem zawka rulh turin an la thei dawn a, Rs. nuai 6 aia tam an la anih chuan Rs. nuai 6 a pelhna kha Bank loan interest rate pangngai angin an rul thung ang. Hemi atan hian HUDCO chu nodal agency a ni ang a, State sawrkar kutah pawisa a awm dawn lova loan pe chhuak tu tur Bank nen indawr in pawisa hman tur pawh Bank ah an dah ang a, an vil zui dawn bawk a ni.

Beneficiary-led Construction (BLC) hi chenna In neilo, kum khata Rs. nuai 3 la lut tlinglo te tan ruahman a ni a, hemi tanpuina dawngtu hian In hmun a neih a ngai thung a, In hmun chu LSC, House Pass leh VC Pass pawm vek a ni a, he tanpuina dawngtur hian rualbanlo awmna chhungkua, natna tihdam theihloh (terminal illness) nei awmna chhungkua, hmeithai leh eizawnna mumal neilo chhungkua te duhsak bik an ni ang. Chenna In nei tawh Rs. nuai 3 kum khata la lut lo, In chhia leh awngrawp tawh tan pawh he tanpuina hi hmuh theih a ni a, mi inluah Rs. nuai 3 kum khata la lut lo, mahni hminga ram nei bawk si tan pawh dil theih a ni. Tanpuina sum hi In pakhat sak nan Rs. nuai 2 a ni a, Rs. nuai 1.5 hi Sawrkar laipui atanga hmuh tur niin Rs. 50000 erawh beneficiary te tum ve tur a ni a, hei hi a pawisa zawng emaw a hmanrua leh tha sen anga chhut theih a ni thung.  Rs. nuai 1.5 hi installment a pek tur niin installment 5 a sem tur a ni. He tanpuina dawng thei tur chuan bank account leh aadhar number neih tel a ngai bawk a ni.

Tun hma lama Sawrkar atanga In sak tanpuina lo dawng tawh te tan he Scheme hnuaiah hian tanpuina a dawn theih dawn lova, BLC leh CLSS tanpuina hi dawn kawp phal ani lo bawk a ni.

Tanpuina dawngtur thlan chungchangah Sawrkar laipuiin a duhtui em em a, khawtlang hruaitute leh Sawrkar official ten a hmuna kalin an en ang a, an thlanchhuahte chu an insakna tur hmun thla an lak bakah Satellite hmanga Central Sawrkarin a vil theih nan a awmna hmun GPS coordinate an la vek dawn a, heng beneficiary thlan te hi State Sawrkar thuneitu te pawm tura chhawpchhuah leh vek ani bawk ang.

Vawiin inhmuhkhawmah hian he scheme thar chungchang a hriatthiamloh leh hriatfiah loh te zau taka sawiho a ni a, beneficiary thlan chungchanga politics inrawlh an hlauhthawn thu sawilan nasat niin department official-te chuan  beneficiary thlan te chu State level hotuten an thlitfim leh dawn bakah Sawrkar Laipuiin satellite atang an hmasawn dan, an hmunhma te a vil reng dawn avangin officialte pawhin fimkhur thei ang berin an kalpui dawn tih an sawi a, dik taka hma lak an tum thu an sawi a ni.

Vawiin inkhawm hi Pu Lalfakawma Chhakchhuak,MCS, DLAO in a kaihruai a, Pu Joseph Darrothanga, SDS in Scheme chungchang sawifiahna hun a hmang a, chawhnu lamah site survey an neiho nghal a ni.