Vawiin khan Lunglei District Level Committee on Afforestation & Conservation chu a vawi khatna atan Lunglei Circuit House Conference Hall-ah an thukhawm a, he Committee dinna meeting hmasa ber hi Lunglei West bialtu MLA Pu Chalrosanga Ralte-in a hmanpui.

Committee Chairman Lunglei DC Pu Abhijit Vijay Chaudhari chuan meeting a kaihruai a, Committee dinchhan a nih chhante sawifiahin Member-te inhmelhriatna hun a hawng a. Meeting hmanpuia tura lo kal Mizoram Environment & Forest Consultative Forum (MEFCOF) Gen. Hqrs. Aizawl President Pu V.L.Bela leh Vice-President Rev.Dr.F.Sangkhuma ten thusawiin an pawl hmalaknate avanga sorkarin Mizoram chhunga ramngaw leh nungcha humhalh kawngah thawhho tura a sawmna angin vawiina District level Committee lo irhchhuah dante an sawifiah bawk.

Vawiina he Committee meeting hmasa berah hian Pu Chalrosanga Ralte, MLA chuan MEFCOF-te thiltum leh hmalakna a ropuiin a fakawm hlea a hriat thu a sawi a, YMA pawhin a vei ber pakhat ram chereu tawh ramngawa siamthat leh nungcha humhalhna kawnga hmalak hi Mizorama cheng mitinten vei a, ngaih pawimawh hial a hun tawh takzet a ni, a ti. Mizoram sorkar pawhin NLUP hnuaia a thil tum lian tak pakhat chu ramchhunga thing leh mau bakah nungcha leh ramsa te humhalh a ni a, vawiina miten kan tu leh fate tan ram chenna tlak leh nuam kan hnutchhiah sak hi kan tih makmawh a ni, a ti bawk. Lunglei District Level Committee on Afforestation & Conservation din ni ta chu a lawmpui thu sawiin, an kal zelna turah duhsakna sang ber a hlan bawk a ni.