No.7942/2020-2021

26.3.2021: Chief Minister Pu Zoramthanga chuan vawiin khan Champhai North bial huamchhunga hmalakna leh hmalakna tura ruahmanna chhawpchhuahte a hmunah tlawhin a enpui. Environment, Forest & Climate Change Minister Pu TJ Lalnuntluanga, Champhai South bialtu ni bawk leh Health & Family Welfare Board Vice-Chairman,  Champhai North bialtu Dr. Z.R. Thiamsanga te’n an tawiawm a ni.

Chief Minister Pu Zoramthanga chuan Hnahlan-a amah lawmna inkhawm, community hall-a an buatsaihah thu sawiin, Covid19 hripui lengin min nuai a, vawiin thleng pawn min la kiansan loh avangin mitin kan fimkhur tlan zui zel a pawimawh a ni, a ti a. Hmasawnna hmathawh rei tak thuanawp pawh hripuiin ziaawm lam a pan chhoh zel beisei chungin kan theihtawp kan chhuah ang, a ti a. Leilung nghenga eizawnna a ni emaw, eizawnna kawng dang dang hmangin sum hnar ngel nghet, intodelhna siam turin SEDP duan a nih thu leh, hemi atanga puihna an hmuh te chu tangkaia mahni intundin tumna nen hman ngei tur a nih thu a sawi bawk a. Kawngpui tha hnai vaiin min pawh tlan chuan ram hmasawnna hi a chak phah thin thu leh, chumi atan chuan theihtawp chhuah mek a nih zel thu a sawi bawk.

Myanmar rambuai avanga Mizorama lo lut an awm chungchangah Pu Zoramthanga chuan Myanmar rama kan unaute an inthlan result tihhlawhtling tura umzuina neiin, a thenin an nunna chhanhim nan India rama Mizorama lo lut te lo tuamhlawm zel hi kan tih awm a ni, a ti a. India sawrkar chuan an lo luh phallo mahse ram hruaitute zuk biain, India chuan heng mite hi lo tuamhlawm zawk tur a nih thu a zuk hrilh thu leh palai pawh a tirh thu a sawi a. Boruak a ziaawm zel a beisei thu sawi bawkin, a nawr zui zel tur thu a sawi bawk.

Forest Minister Pu TJ Lalnuntluanga chuan tunlai khaw thal tak karah kangmei chhuah mai a hlauhawm thin avangin mitin fimkhur turin a chah a. Nungcha te nen mihring chu inlawm tawn kan nih avangin leh boruak thianghlim kan neih zel nan ram tikang lo turin kalkhawmte a chah a. Khawtlang mipuite chu ram neitu rilru pu reng tura chahin, sawrkarin hmasawnna hna thawh te hi a nih ang tura hlawhtling tur chuan mipuiin sawrkar an tawiawm danah thui tak a innghah thu a sawi bawk.

Dr. Z.R. Thiamsanga pawhin thu sawiin, Hnahlan chu ramri depa awm a nih avangin thenawm ram atanga ruihhlo leh dan phalloh thil tawlh ruk thin chu chak zawka lo dang bet tur chuan police hmun neih a pawimawh thu te a sawi a. Bial chhunga hmasawnna atan mamawh hrang hrangte tarlangin, thalaite tana hmasawnna leh chhungkaw intodelhna a ngaihpawimawh thu te a sawi bawk.

Chief Minister hian Hnahlan khelmual, Hnahlan Hr. Sec. School leh Primary Health Centre te tlawhin, Hnahlana Home department hmunhma tura khawtlangin lo ruahman chhin chu a enfiah a. Hnahlan bakah hian Ngur leh Vaparah khawtlang mipui nena inkawmna hun tawi a hmanpui bawk a.

Champhai Helipad, Champhai South Hr. Sec. School, Champhai College, Champhai Hr. Sec. School leh Chhangphut Field - Hospital Road via Falkawn road laih zau dan tur te Chief Minister hian a enfiah bawk a. Champhai College-ah hian thawktute nen inkawmna tawi a nei a ni. Chief Minister hian District Court hmun tura ruahman te, Police thana, CHANEM building, Champhai Bazar leh Choka lui te a en bawk.

Chief Minister hi Champhai DC leh SP te, Home, PWD leh sawrkar department dangte atangin an tawiawm bawk a ni.