Vawiin khan Chief Minister Pu Lal Thanhawla chuan Champhai Zotlang Sports Stadium a hawng a. He khelmual hi Ministry of Urban Development tanpuina sum, Development for 10% Lumpsum Grant for North Eastern Region atanga sum hmuh, Rs.2238.69 lakh senga sak a ni.
Sports Stadium at Zotlang, Champhai hawngtu, Chief Minister Pu Lal Thanhawla chuan, "Thalaite tan khawvel thar kan siam ang kan tih kha kan ti hlawhtling mek zela; khawvel vang dap a Mizo thalaite an inzarpharh nan tan kan lak chhoh zel avangin a hlawhtlinna kan hmu chho mek a ni. Vawiina stadium tha tak kan hawn pawh hi infiamna khawvel huang bika thalaite tana khawvel thar kan siamna kawnga rahbi langsar tak a ni a. A hmangtuten rilru leh taksa hriselna, chhunglam leh pawnlam thianghlimna nen an hman chuan an tan infiamna khawvela hlawhtlina intanna hmun a ni dawn a ni", a ti.
Hmasawnna tehna rintlak bera sawi state kumkhat thawhchhuah a hlawk leh hlawkloh tehna, State Gross Domestic Product ( SGDP) ah Mizoram chu kum 2013 atanga 2016 chhunga 8% aia sang SGDP nei char char state 4 zinga mi a ni a ti a. NITI Aayog tarlan dan a nih thu leh ei leh intur khawp kham hmu phalo mihring tlemna ber state zingah pawh NITI Aayog bawkin Mizoram chu a dah leh a. Kawng tam takah state lian leh changtlung zawka ngaihte aiin Mizoram chu a chetha zawk tih sawiin Sports Infrastructure-ah phei chuan sawrkar leh a enkawltu Minister remhriat leh taihmak vangin Mizoram chu a changtlung ber pawl a ni tawh a ti.Mizoram hmalam hun a eng tih Chief Minister chuan sawiin, "Border trade Zokhawthar-ah a awm tawh a, Kawrpuichhuah-ah chak taka hmalak mek a ni a Bangladesh Prime Minister pawh keini aimahin a phur a. Multi Modal kawngpui a tlang hunah phei chuan Mizoram chu Gateway for Trade and Commerce with South East Asia a ni dawn a. Chumi tih puitlin nan chuan Relkawng siam mek a ni a, Mara rama Latawh hmunah thlawhna tumhmun pawh buatsaih turin chak takin hma kan la mek a. Heng zawngah te hian kan hlawhtling chho ngei turah kan inbeisei a. Tuna kan dinhmunah pawh state hmasawn ber zinga mi kan nih avangin central sawrkarah tute pawh awm se ngaihthah chi kan ni tawh lo a ni", a ti.
Sports leh UD&PA Minister Pu Zodintluanga chuan Sports Stadium at Zotlang project rawn pianchhoh dan te leh UD&PA Department anga hnathawh te a tarlang hmasa a. Stadium tha tak an neih avangin Champhai District mipuite a lawmpui tih sawiin Champhai thalai - nula leh tlangval ten khelmual tha chu sawrkarin an hnena chona thar a pek tih an pawm erawh a ngai a ti a. " Champhai thalai ten khelmualtha hmanga chona kan pek che u hi in chhan ngei kan duh a; infiamna khawvelah Mizoram hi India leh international levelah in tih hmingthat zel nan duhsakna ka hlan che u", a ti a ni.
Agriculture Minister Pu KS Thanga pawhin thusawina hun hmangin 'khelmual tha kan duh' tia thalaite tuihal au rual chu sawrkarin khelmual tha tak tak siamin a chhang mek zela, a hlawhtlinna kan hmu nasa tawh hle a ni a ti.
Thusawitu dang Champhai North bialtu MLA Pu TT Zothansanga chuan sawrkar in mipui hamthat nan kawngtin reng a hna a thawh thu leh dik tak leh hleihbik nei lova a hnathawh te a kalpui thu a sawi a. Sawrkar hnalakah phei chuan diklo takin sawrkar a inrawlhlo tih sawiin Peon hna atanga Gazetted Officer hna thlengin dik taka advertisement chhuah a; exam kalphung pangai thlap zawhkima lak vek a ni a; induhsakna pakhat mah a awm lo a ti.
Zotlang Sports Stadium hawnna programme hi Fisheries Minister Pi Vanlalawmpuii Chawngthu, Aizawl atanga kal official te leh Champhaia Official pawimawhte ten an chhim bakah tualchhung mipui ten an tawiawm tha hle a ni. UD & PA Secretary Dr. C.Vanlalramsanga'n Stadium hawnna hun hi a kaihruai a; Technical Report chu Pu Vanlalmawia, Jt Secretary, UD&PA in a pe thung a. Exhibition match football inkhel in official programme hi a chhunzawm nghal a ni.
Champhai Sports Stadium chhungah hian :- Astro/Artificial turf phah a siam football ground adung metre 100 leh avang metre 60 a zau, Mual hualchhuaka Intlansiakna hmun - Square Metre 4108.48 a zau 8-lane Synthetic Running Track, Mipui 3500 zet thut theihna tur RCC Gallery, VIP Gallery - mi pawimawh rual thutna tur mi 100 atanga 150 thleng thut lenna, Square Metre 400 a zau Boxing Hall, Players' Room, 2-wheeler 200 leh LMV 50 vel lenna tur lirthei hunna leh a hran a Mipa leh Hmeichhe inthiarna tur hmun 4 te dah a ni. Champhai Sports Stadium sak hna hi Nodal Department - UD & PA enkawlna hnuaiah National Building Construction Corporation Limited(NBCC) ten an thawk a ni.
