Health Minister Pu Lal Thanzara chuan vawiin khan Infant Mortality Rate (IMR) Incentive Grant atanga Rs. 42,25,000 seng a lei Medium Ambulance pahnih (Advance Life Support Ambulance leh Basic Ambulance) chu Chief Minister's Conferene Hall-ah a enkawltu tur Directorate of Health & Medical Education aiawh an Director Dr. T.Lalhmangaihi hnenah a hlan a ni.

Health Minister chuan IMR Incentive Grant atanga ambulance pahnih lei belh a ni chu lawmawm a tih thu sawiin, Health & Medical Education Directorate chuan tangkai taka an hman ngei a beisei thu a sawi a. Directorate of Health Services leh Directorate of Hospital & Medical Education te chu pumkhat tho an nih avangin indaihloh leh mamawhna thilah chuan inpuihbawm zel tur an nih thu a sawi bawk.

Ambulance pahnih hi 13^th Finance Commission Grant atanga Reduction of Infant Mortality Rate atana Health Department in sum a hmuh atanga High Level Committee thukhawm in lei a remtihna bawhzui zelna rah niin, Medium Vehicle Ambulance (Force Motor Ambulance) 2 (pahnih) chu M/S AEON Medical Pvt. Ltd., lndore, Madhya Pradesh hnen atanga lei, Registration pawh tihfel vek tawh an ni a. An Registration No. te chu MZ01-N-9391 (Advance Life Support Ambulance) leh MZ01-N-9392 (Basic Ambulance) an ni. A chhunga khawl dah tur ang pawh 21.11.2017 khan Company atanga Service Engineer lokalte chuan vuah fel in, Civil Hospital-a Doctor-te hnenah Demonstration pawh pek nghal a ni bawk. 

Advance Life Support Ambulance zawk hi ICU anga hman theih turin thuam a ni a, a chhungah heng khawlte hi dah a ni: 1) Transport ventilator, 2) Multi Parameter Monitor (with BP Cuff, SPO₂ Probe, ECG Cable, Charging Cable), 3) Infusion Pump, 4) Laryngoscope set, 5) Suction Machine with DC Adaptor, 6) Oxygen Flow Meter with humidifier, 7) Folding Stretcher, leh 8) Fire Extinguisher. Heng Medium Ambulance pahnih leh a chhunga khawl dahte nen hian Rs. 42,25,000 (Basic Ambulance = Rs. 16,35,566.17, Advanced Life Support Ambulance = Rs. 25,89,433.83) senga lei an ni.

Ambulance inhlanchhawnna hunah hian Health Commissioner Pu Lalrinliana Fanai, Principal Director Dr. F. Lianhlira, Dr.H.Lalchungnunga, Director, Health Services leh officer dangte an tel a. HME Director Dr. T.Lalhmangaihi chuan ambulance chu a man a to em avangin department budget ringawt atanga beisei ngam thin a nihloh thu leh, hetianga remchang a awm ta chu lawmawm a tih thu a sawi a ni.