Chief Minister Pu Lal Thanhawla chuan vawiin khan Champhaia Chhangphut field a phul lem, synthetic football turf phah thar chu a hawng. MFA Cup vawi 15-na khelh nghal a ni a, Champhai district leh Kolasib district team te an inkhel hmaa ber a ni.

Chief Minister chuan Champhai in infiamna hmun changkang leh changtlung tak an nei ta chu lawmawm a tih thu a sawi a, hetiang ang field tha hi state dang ten an awh ve em em a ni tiin, duh duh huna neih mai mai theih a nilo a ti a. A hmang thin turte chuan duat taka enkawl leh hmang thin turin a chah a, in duat siakah inel thin turin mipuite chu a ngen a ni.

Chief Minister chuan thalaite tan khawvel thar kan buatsaih ang an tih thin ti hlawhtlingtu a ni tiin, zoram hmun hrang hranga sorkarin hma a laknaah hlawhtlinna an hmu chho mek a ni a ti a, kan tlin tawk ang zelin hma kan la chho zel dawn a ni a ti. Football hi eizawnna mai a nilo a, kan thalai ten hausak nan an hmang chho mek a ni a ti a. Fiald thar tha tak hawn tak chu a hmang tu tur ten neitu rilru pu chunga hmang thin tura chah nawnin, a chhawr ber tu nih tum theuh a, khawi hmunah pawh sportsman spirit vawng nung reng turin infiammite chu a chah a ni.

Chief Minister hian field a luhna motor kawng chu PWD in Rs.15 lakhs senga an siam that tur thu a sawi bawk a ni.

Chhangphut field astro turf phah tak hi Govt of India, Ministry of Youth Affairs & Sports hnuaia Urban Sports Infrastucture Scheme atangin Cheng nuai zali sawmnga sanction atanga siam a ni a.Turf phahna tur hian Chief Minister Pu Lal Thanhawla hian ni 1, August 2013 khan a lungphum a phum a. Hemi hnu hian tender chhuah nghalin, Lushai Engineers Ramhlun hnenah work order hi pek a ni.

Chhangphut fielda phul lem phah hi adung 110metres leh avang 75 metres a zau a ni a. Football line bik hi adung 105 metrs leh avang 70 metres niin, line pawnah free space 2.5 metres a awm kual chhuak vek a ni. Line marking zawng zawng hi rawng hnawih niloin, astro var phahin lineah hman a ni. He synthetic footbal turf hi FIFA Standard niin, ‘Soccer’s Pro MS 60’ Limonta Sports Company, Italy siam a ni.

Field-ah hian security fencing & normal lightin Rs.32,02,600/- senga siam a ni bawk a. A siam hna zawng zawng hi ni 11, October 2014 khan zawh a ni.

Chhangphut field hi tunhmaa wheat chinna thin anih avanga chhangphut field tia vuah a ni a. Pu Chalbuaia leh Pu Damliana te ram thin niin, khawtlang hnenah field atana an pek a ni.

Hawnna inkhawm hi Pu Zodintluanga, Minister for Sports etc in a kaihruai a, Chhangphut Feld Astro Turf phah hian Lal Thanhawla kaihhruai sorkarin thalaite hmakhua a ngaipawimawhzia tilangtu a ni a ti. Chief Minister hi Pu Lal Thanzara, Minister of State for Health leh bialtu MLA Pu T.T.Zothansanga, Parliamentary Secretary ten an tawiawm a ni.