Chapchar Kut 2018 puala Post-Souvenir siam chu vawiin khan Chapchar Kut Organizing Committee Chairman, Chief Minister Pu Lal Thanhawla chuan CM Cabinet Meeting Room-ah a tlangzarh.

Chief Minister chuan Chapchar Kut Post Souvenir chu thangtharte leh mipui nawlpuiin pi leh pute huna an nunphung leh khawsak dan te kan hriat chian lehzuala, hnam rohlute vawnhimna leh chhawm nun zel a tulzia hriatnaa buatsaih a nih anga tangkai taka hman a nih a beisei thu a sawi a. Mizoram chuan Hnam nun phung leh zia rang chawimawina leh pholanna ni bawka, khualzinmite hipna ni pah fawmin Kût huapzau taka lawm thin a ni chu lawmawm a tih thu a sawi a. Khualzinmite hip kawngah Mizoram chuan theihna nei tam viau mahse, hmasawn lehzual tur chuan kan rilru put hmang te thlak a ngai em tih ngaihtuah tel tul a tih thu Chief Minister chuan a sawi a. Tu tan pawh khualthlengtu tha nih chu tourism hlawhtlinna in a ken tel a nih thu a sawi bawk. Hengte bakah hian Mizoram hmun hrang hrangah Archaelogy leh History lam hawi atanga hmun pawimawh tak tak te leh hmuhnawm tak takte awmte chu a nih dan ang anga humhalh a pawimawh thu a sawi bawk.

Souvenir tlangzarhna inkhawm hi Pu David L. Thangliana, Director, Information & Public Relations Department chuan a kaihruai a. Pu C. Lalhmachhuana, Organizing Committee Secretary leh Dr. Laltluangliana Khiangte, Souvenir Editorial Board Member ten thu an sawi bawk.

Vawiin programme-ah hian Pu Lalrinmawia Ralte, Political Advisor to Chief Minister; Pu R.L. Rinawma, Principal Adviser to Chief Minister ; Pu L.R. Sailo, Press Secretary to Chief Minister; Pu R. Hmingthanzuala, Director, Art & Culture Department leh Chapchar Kut Organizing Committee member dangte an tel a ni.