1246/2024-2025

Dated Aizawl, the 22nd July, 2024: Vawiin khan Chief Minister Pu Lalduhoma, Chapchar Kut, 2024 Organising Chairman ni bawk chuan CM Conference Hall-ah Chapchar Kut 2024 Post Souvenir a tlangzarh.

Tlangzarhna thu a sawinaah Chief Minister chuan, kum 70 kan lo pel ve ta a, kan hmuh phak china thil inthlakthleng hi a tam tawh hle. Thil inthlakthleng zel hi kan thatpui nge kan chhiatpui zel tih pawh hriatthiam a har. Rei vak lo Server han down te hi kan buai phah em em tawh a, mahse internet hmang ve lo, changkang lova kan hmuh te tan erawh buai phahna a awm lem lo. International ramri te, state ramri te, hnam hming (nomenclature) thlengin a danglam fo mai. Zofate inrelbawlna pawh hi a la danglam zel lovang tih kan sawi thei lo. A tha zawnga danglamtir tumin ngaihtuahna pawh kan seng a, hmathlir zau leh huapzo tak kan nei. Chapchar Kut kan kalpui dan pawh hi kan inunauna titha zawnga huapzo taka kan kalpui thiam a ngai a, hmanraw tangkai takah kan hmang tur a ni. Tin, Tawng hi hnam min phuar khawmtu a ni a, min tidarhtu pawh a ni thei. Chuvang chuan Zofate hian mahni tawng theuh kalsan chuang lova kan zaa kan inhriattawnna tur tawng pakhat kan chawilar thiam a tul hle a, common language tha tak pakhat kan neih tel ngei a tul. Chu chuan nasa lehzualin min phuarkhawm ang. Information & Public Relations Department leh Art & Culture Department te hi chumi kawngah leh Zofate inpumkhat zelna kawnga mawhphurhna pawimawh tak chelhtute in ni a, theihtawp in chhuah zel a tul hle a ni, tiin a fuih. Souvenir Editorial Board ten Chapchar Kut Post Souvenir tha tak an buatsaih avangin lawmthu a sawi a ni.

Pu C. Lalsawivunga, Minister, Art & Culture, Chapchar Kut Organising Co- Chairman pawhin thusawiin, Souvenir tlangzarh a ni ta chu lawmawm a tih thu leh Editorial Board te thawhrimna chu fakawm a tih thu a sawi a. Art & Culture pawimawhna leh an hmalakna tlangpui te a sawi bawk.

Pu Lalsangzuala, Member, Editorial Board chuan Post Souvenir an buatsaih dan report a pe a. Kumin Chapchar Kut thupui kha 'Zo nun ze mawi - tlawmngaihna' anih angin hemi lam hawi thupui hrang hrang Mizo tawnga ziak 13 leh Sap tawnga ziak 4, thlalak te leh report te a awm a, phek 180 a chhah niin Bu 2500 an herchhuak a ni. Editorial Board te hian a sem chhuah dan tur pawh fel fai takin an ruahman sa a ni.

Souvenir tlangzarh inkhawm hi Pu C. Lalnunkima, Director, I&PR, Editor, Chapchar Kut Post Souvenir ni bawk chuan a kaihruai a, Chief Minister ngeiin Souvenir a tlangzarhsak avangin lawmthu a sawi a, Editorial Board Member kal te inhmelhriattirna a nei bawk.