1247/2024-2025

Aizawl, the 22nd July, 2024: Mizoram Nursing Council leh National Institute of Health & Family Welfare (NIHFW), New Delhi-te tangkawp buatsaih ni 5 awh tur, 'Training on Leadership in Infection Prevention & Control (IPC) for Nursing Professionals' chu Mizoram Nursing Council Training Hall, MINECO, Aizawlah vawiin chawhma dar 9:00 khan Health & Family Welfare Minister Pi Lalrinpuii'n a hawng. 

Health & Family Welfare Minister Pi Lalrinpuii chuan nurse-te fuihna thu tha tak sawiin, nurse hna chu hna zahawm tak leh damlote tana an tawngkam ringawt pawh damna leh thlamuanna a nih thu a sawi a. Infection prevention and control lama nurse-te pawimawhzia sawiin, training nei tura kalkhawmte chu an awmna district theuha midangte zirtirtu tur trainer pawimawh tak an nih dawn avangin uluk taka training nei turin a chah a ni.

Training hawnna hun hi Pi Mary Ramte Pachuau, President, Mizoram Nursing Council (MNC) &  Deputy Director (Nursing) in kaihruaiin Pi Zochuanpuii, Registrar, MNC in report kimchang a pe a. Pi Lalchhanhimi, Vice President, Joint Director (Nursing) ni bawkin lawmthu sawiin hun hman a khar a ni. He training hi Mizoram District zawng zawnga nurse-te training pe chhawngtu tur Training of Trainers niin tum 3 neih tura ruahman a ni a, tun tum hi a tum 1-na a ni.

He hunah hian Dr. Vanlalsawma, Principal Director, Health & Family Welfare Department, Pu R. Lalbiakzuala, Addl. Secretary, Health & Family Welfare Department, Mizoram Nursing Council member-te leh Nursing Officer-te an tel a ni.