No.7663/2020-2021
Chief Minister Pu Zoramthanga chuan tukin khan Chite Lui ruam a Smart City hnuaia Chite Football ground sak tur te, Convention Centre sakna tura ruahmanna an siam chhin te leh 1st MAP Ground thuamthatna hna kal mek chu a hna kaihhnawih department hotute nen a hmunah an enfiah.
Chief Minister chuan Aizawl khawpui thang zel tan Convention centre chu a tangkai tur thu a sawi a. Chite lui ruam chu khawpui tana tangkai tur tak tak hmasawnna ruhrel din belhna atan remchang tak a nih thu te, ruahmanna tha tak nen chuan khawpui traffic pawh chhawk zangkhai thei turin lirthei tlanna kawng te siam belh a, bus terminal leh shopping complex siam te pawh a remchan theih thu a sawi bawk.
Convention Centre leh a kaihhnawih infrastructure dangte dinna tur hi sawrkar laipuia Tourism Ministry in a hmalakna pakhat Assistance to Central Agencies for Tourism Infrastructure Development hnuaia sak tur a ni a. Convention centre a project management consultant rawih chu WAPCOS niin project cost chu cheng nuai 4899 bawr vel a ni. Auditorium, conference leh meeting hall, etc. bakah a panna kawng te, a bulhnaia park siam te, ruah tui dawhkhawlna leh a dangte he project hian a huam tel a.
Chief Minister hi Sports Minister Pu Robert Romawia Royte, Chief Secretary Pu Lalnunmawia Chuaungo, Addl. Chief Secretary Pu JC Ramthanga, Tourism Commissioner & Secretary Pi Esther Lal Ruatkimi, Horticulture Department director Pi Elizabeth Saipari, Tourism director Pu V. Lalengmawia, MSSC Secretary Pu John Tanpuia ten an tawiawm a ni.
