Vawiin hian Pu Lalruatkima, honourable  Minister, RD, I&PR, Revenue, etc., chuan  Rurban hmanga kalpui tur Leng Smart Village Project te, E. Lungdar block chhunga khaw hrang hranga chhungkaw thlanchhuan te tana tuizem semna te, Leng Turmeric Processing Unit te leh E. Lungdar Mini Sports Complex tharte a hawng. 

Zingah E. Lungdar khawtlangin amah lawmna inkhawm E. Lungdar kawna an buatsaih hnuah E. Lungdar BDO Office tualah SPMRM Rurban atanga lei tui dahkhawlna (Individual Water Storage Tank, 2000 Ltrs.) chu a dawng tu tur chhungkaw 80, Sailulak, Leng, Bawktlang, Mualcheng, E. Lungdar, Chekawn, Lungchhuan, Khawlailung leh Sialsir khuate atanga thlanchhuahte a hlan a. He hunah hian Pu Lalruatkima chuan; Rurban hmalakna kalpuina tura thlan zingah E. Lungdar Block a tel chu lawmpui thusawiin he hmalakna zar hi mipuiten kan chhawr nasa hle a. Tin, Mizoramin kan hman that avangin thuneitu sang zawk atangin duhsakna thilpek pawh kan dawng hial a ni, a ti. Ramin hma a sawna mihring kan changkang ang zelin kan tui mamawh a pung ve zel thin. Chumi hre reng chung chuan vawiinah pawh Rurban atangin chhungkaw 80 ten tui dahkhawlna kan dawng a ni a, tun tum hi kan sem hmasak ber a ni nghe nghe. Tangkai taka lo hmang ngei turin duhsakna ka hlan cheu a ni, a ti.

Hemi zawh hian Minister hian Leng khua panin khaw daiah Leng Sial Vulhtu Society ten an lo hmuaka, Minister hian an Sialte a en sakin an mamawhte a ngaihthlak sak a, Society hian Minister hi Sial puitling lo pein an enkawl sak zui dawn a ni. Hemi zawh hian Leng Turmeric Processing Unit Rurban atanga din thar hawngin an hmunhma te a en sak bawk.

Aieng sawngbawlna a hawn zawh hian Saihnuna Hall ah Rurban Convergence hmanga kalpui tur Smart Village Project hawnna inkhawmah khuallian niin Leng Smart Project hawnna a nei leh a. He hun Pu Malsawmtluanga, PD, DRDA, Serchhip kaihhruaiah hian Minister chuan, Leng khua chu Smart Village kalpui nana thlan tur dik tak a nia a hriat thu sawiin, a hlawhtlin ngei theih nana thawhpuiah Leng mipuite chu a sawm a.  Hman lai ata lal fing tak nei thin; khawtlang mipui fel tak nei thin khua an ni a. Chung thiltha tinreng te chu vawiinah pawh chhawm nung zel turin a ngen a ni. Mizoramin hmasawnna hmel duhawm tak tak a hmu zel tih sawiin ei leh bara intodelh tura hmalakna kawngah pawh kan thang zel tih a sawi a. Chutiang kawnga hmalakna zingah Serthlum te, Aieng te leh Sial vulh chenin Leng khuain an thawh hlawk hlea, a lawmawm hle a ni, a ti. Tun hnaiah Leng khuain tuihna humhalh kawnga Northeast zone a lawmman an la chu chhuanawm a tih thu a sawia, faina kawnga Leng hmalakna te, a mawina te, mipuite lungrualna te chu midangte tan entawn tlak nia a hriat thu sawiin midangte tihhmuhtu nih zel tum turin a chah a. Hmasawnna leh changkanna tam tak chu rilru put hmang dik atanga intan a nih thu sawiin engkim sawrkar atanga beisei vek lova a theih chin china sawrkar thawhpuia tanpuitu nih tum zel zawk turin a chah a ni.

He hunah hian Pu H. Lalhruaitluanga, BDO, E. Lungdar chuan Smart Village Project kalpui dan tur tlangpui sawifiahna a nei a, Smart Village hnuaiah  hmalakna tur hrang hrang, hriselna lam kawngah te, eizawnna kawngah te, faina leh thianghlimna bakah khaw tihmawina kawngah te, digital learning school te, Insurance te, free wifi te, Open Gym te, Senior citizen recreation centre te, Green House farming leh food processing unit te, bazar tha te, Solar street light te, cold storage te leh khawtlang inrelbawlna tha tinreng te neih tuma hmalak chhoh zel anih tur thu leh tun dinhmunah pawh engemawzat a taka neih anih tawh thute a sawi a ni.

Pi Lalchhandami, Chief Executive Officer, MzSRLM chuan Aieng tlangzarhna leh thusawina hun a nei bawk a. MzSRLM hnuaia hmalakna hrang hrangah Leng khawtlangin tha taka hna an thawh thin avangin lawmthu a sawi a, hmachhawp hrang hrangte pawh theihtawp chhuaha lo bei zel tura sawmin, MzSRLM hmalakna tinrenga Minister Pu Lalruatkima thahnemngaihna leh inpeknate ropui a tih thu sawiin lawmthu a sawi a ni.

Lenga Smart Village Project hawnna inkhawm hi Pu B. Vanlalfinga, Leng VCP chuan lawmthusawiin a khar a ni.

Lengah hun a hman zawh hian Minister hian E. Lungdar a pan leh a, Rural Development Department kal tlanga NLCPR fund Rs. 434.96 lakh senga sak E. Lungdar Mini Sports Complex a hawng leh a ni.

A hawnna inkhawm Mini Sports Complex Pavillion a hun buatsaihah Pu Lalruatkima chuan, E. Lungdar Mini Sport Complex a puitlin theih nana sul lo su tawhtu zawng zawngte chungah lawmthu a sawi a, a beisei aia tha a nih thusawiin, ram tana rotling E. Lungdarin an nei chu a lawmpui a ni. Infiamna lamah kalphung mumal tak kan mamawh avangin sawrkar chuan tunhnai lawkah Sports Policy tha tak a nei ta a, infiamna hmanrua leh hmunhma te pawh nasa taka siam chhoh zel niin Mizo thalaite pawh infiamna lamah an feh chhuak nasa tawh hle a ni. E. Lungdar pawhin Zofate zinga Olympian hmasa Lalremsanga a lo hring tawh a, amah ang bawka zofate leh India ram tihmingthatu tur infiammi hrin zel i tum ang u, tiin khawtlang mipuite a fuih a ni. Infiamna hmangin ruihhlo leh nun kawng thalo tinreng kan tudawl ang a, hriselna leh ram tihmingthatu ni khawp hiala hmasawn kan tum zel dawn a ni, a ti. He Complex thara Volleyball Court tha tak siamna tur sum tunah hian sanction tawh a ni a, Futsal ground, zanah pawha hman theih tur pawh dah belh kan tum a ni, tiin Mini Sports Complex tihchangtlun zel anih tur thu a tarlang bawk.

Mini Sports Complex sak dan technical report hi Pu David Lalchhuanawma, AE, RD Department chuan a pe a. Hna hi kum 2017 a tan niin Lushai Engineering ten hna hi an thawk a, kum 2019 July thlaah thawk zovin vawiin hian hawn a ni ta a ni. Football ground hi a dung 105 m leh a vang 65 m niin level hi a thara lak vek a ni a, lei hnuai tuichhe paihna tur hi 2.5mtrs danah dah vek a ni.  A dung tawn tawnah side drain siam a ni bawk. A sirah hian Toilet pahnih, bedroom pahnih, Kitchen hall pakhat leh dressing room pakhat awmna Pavillion tha tak leh mipuite thutna tur Gallery sak a ni bawk. Tin, playground hi hung vek a ni a, a sirah Multipurpose hall tha tak leh Tennis  Court sak a ni bawk a, futsal ground leh volleyball court sak belh tura ruahmanna siam fel a ni tawh bawk a, a chhehvel lungrem tul lai leh a panna kawngte pawh siam vek a ni.

He hun Pu Malsawmtluanga, PD, DRDA Serchhip kaihhruaiah hian Pi Lalchhandami, CEO, MzSRLM pawhin Lungchhuan Village Organisation ten an siam Mizo Chilli tlangzarhna neiin thusawina hun a hmang bawk a, Minister Pu Lalruatkima zarah MzSRLM hmalakna tam tak chu covid19 karah pawh kan kalpui thei a,  a bikin fund nawra Central dawr kawnga a thahnemngaihnain rahtha a chhuah nasa em em a, vawiinah pawh Mizo Chilli te, Mizo Aieng te kan tlangzarhin kan hawn theih phah a ni,  a ti.

Mini Sports Complex hawnna inkhawm hi Pu K. Lalngaizuala, VCP, E. Lungdar chuan lawmthusawiin a khara, hemi hnu hian E. Lungdar GSA leh Leng GSA ten exhibition match an khel a ni.