Vawiin khan Chief Minister Pu Lal Thanhawla chuan Peace Ground, Tuibong, Churachandpur-ah Chavang Kut 2016 (Celebration of Brotherhood) buatsaih chu khuallian niin a hmanpui a, Zo hnahthlak hrang hrang te inkara inaunau leh inlaichinna tha zawk neih a pawimawh thu a sawi.
Chief Minister Pu Lal Thanhawla chuan Chavang Kut 2016 Organizing Committee ten Kut hmanpui tura amah an sawmna chu lawmawm leh ropui a tih thu sawiin chhulkhat chhuak leh thisen zawmpui te kan ni a, kan zavaiin unau vek kan ni, a ti a. Kumpinu Sawrkarin Zo hnahthlak te chu ram pathum - India, Myanmar leh Bangladesh ah te min thendarh a, chu mai chu ni lovin India ramah pawh Mizoram, Manipur, Assam leh Tripura ah te Zo hnahthlak te hi min thendarh leh a, mahse hemi avanga hian tu te mah beidawng tur kan ni lo a. Kan awmna hmun leh kan awmna Sawrkar ah theuh rinawm takin, ram leilung fa leh neitu nihna chan changin, kan dikna leh chanvo te humhalh chunga kan awm hi a pawimawh a ni, a ti a. Zo hnahthlak te hi rolrelna pakhat hnuaiah kan la awm lovang tih a sawi theih lova, Zo hnahthlak te hian inpumkhat tur kan ni tih hriain beiseina eng nen hma lam hun kan thlir thiam a tul a ni, a ti.
Pu Lal Thanhawla chuan Zo hnahthlak te chenna ram chin chu khawvel sakhaw lian pathum – Hindu, Buddhist leh Muslim sakhaw vautu ten an hualbeh thu sawiin Pathianin Chanchin Tha hmanga min zawng chhuak leh hun reilo tea Ringtu a min siam vek te hi thil mak danglam tak a ni a, hei hian Pathian lakah Zo hnahthlak te hi kan special zia a ti langin ka hria, a ti a. Min Kotu kan chawimawi a, min zawmchhuahna chhan, Chanchin Tha hrila khawvela kan rahchhuah chuan entikah emaw chuan Zo hnahthlak ram luah chin hi independent ramah Pathianin min la dah lovang tih a sawi theih lova, amah chawimawiin rinawma, dikna leh taimakna nen kan awmna hmun theuh kan inpumkhatna leh kan inunauna tichak zawnga ken kan pen theuh a pawimawh a ni, a ti.
Chief Minister chuan Chavang Kut hmang tura ka lokal hi mikhual kan ni lo a ni tih in hriat ka duh a, chutiang bawkin Zo hnahthlak tu te mah hi Zo hnahthlak te Jeruasalem Mizoramah hian in mikhual bik lova a, nangni leh keini in a kan Sawrkar tih theih chu Mizorama kan rorelna hi a ni a, Zo hnahthlak te inpumkhatna atan nu leh pa chanchangin tling lo takin kan theihna chin chinah hma kan la zel a ni, a ti. Mizoram pawmna Zo hnahthlak te chu an thawhrimna leh an taimakna avanga Sawrkar ngheng leh rinchhan lovin rinawmna, dikna leh taimakna nen an mahni kea an ding chu fakawm leh ropui a tih thusawiin hei hi a entawntlak hle ni a ti a.
Manipur rama tlang mite harsatna leh an enhranna tur ram chungchanga dan siam tum chu pawm lo turin Sawrkar laipui thuneitu te a ngen thusawiin ka tih tur hi ka hria, ka ti zel dawn a, a chhan chu tui aiin thisen hi a tak zawk a ni, a ti a. Kumina Myanmar rama Chapchar Kut hmanga Zo hnahthlak te a tlawhnaa report kimchang chu External Affairs Minister Pi Sushma Swaraj hnenah ziakin a thlen thusawiin Zo hnahthlak te tana rohlu Khampat Bung Heritage Banyan Tree humhalh sak turah Myanmar Sawrkar ngenna chu External Affairs Minister-in tha takin a lo dawngsawnga, a humhalh nan hian hma a la mek, a ni, a ti a. Myanmar ramah awm Zo hnahthlak te nen intlawhpawhna tha zawk kan neih theih nan hma kan lak tum mekna te hi External Affairs Minister in min phurpui a, chak taka hmalak sak min tiam a ni, a ti a. Chavang Kut chuan Zo hnahthlak te inkara inpumkhatna thlen se tia a duh thusawiin Kut hmang turah lokal zawng zawngte chu duhsakna a hlan a ni.
Chavang Kut 2016 ni thum ( October ni 30, 31 leh November ni 1) chhung a awh a. Nithum chhung hian Zo hnahthlak hrang hrangte bakah Hmarchhaka hnam hrang hrang tan hun an hmangin hnam lam leh zia programme te siam a ni a.
Vawiina programme ah hian Pu Robul Pudaite, Chairman, Souvenir Committee chuan inlawm thu sawiin DC Churachandpur Pu Lungminthang Haokip leh Kuki National Organization President Pu PS Haokip ten Chief Minister hi thilpek an hlan a, Dr. Chinkholal Thangsing in lawmthu sawiin chawhma hun a khar a ni.
