Finance Minister Pu Lalsawtan State Bank of India leh North-East Rural Livelihoods Project (NERLP)ina a buatsaih SBI Micro ATM chu vawiin khan a hawng a, Banking Facilitator 13 te hnenah Point Of Sale khawl hman nghal theih chu a hlan bawk a ni.

Pu Lalsawta, Finance Minister, Khuallian ni bawk chuan he inkhawmah hian thu sawiin he scheme hi zokhua lam Bank ina a thlen lohna hmun mipuite tan a tangkai hle dawn a, he hmalakna avanga zokhua lam unaute a lawmpui thu a sawi a ni. Bank ah emaw, ATM emaw kal ngai loin mipuite chuan ATM card emaw Rupay card emaw hmangin pawisa daluh ,lakchhuah leh transfer a theih dawn ani a ti. Hemi hna thawktur hian Banking Facilitator 13 te chuan POS khawl hmangin khaw hrang hrang 60 an vil dawn a, mipuite chuan an mahni kal tlangin awlsam takin bank an dawr thei dawn a ni tiin Pu Lalsawta chuan Bank Facilitator hna chu eizawnna tling anih thu leh Bank Facilitator te chu taihmakna, rinawmna leh tei rei peihna nena Midang tana malsawmna ni tur leh mipuite tana rin ngam leh rintlak ni turin a fuih.

Aizawl Bawrhsap Pu Kannan Gopinathan pawhin thu sawiin SBI leh NERLP te hmalakna chu fakawm atih thu leh Zokhua lama mipui ten tangkai thei ang bera hmang turin duhsakna a hlan a. He hmalakna hian bank awm lohna khuaa ei leh bar zawnna kawnga sum vir vel chu a pun ngei a beisei thu a sawi bawk.

He hawnna inkhawm hi banking facilitator 13, NERLP Officials leh SBI Officials te bakah Bank hrang hranga hotuten an telpui a ni.

He hawnna inkhawm hi Pu Ralkhuma Ralte, Lead District Manager, Aizawl District chuan a kaihruai a ni.