Chief Minister Pu Zoramthanga chuan vawiin khan Kawnpui, Churachandpur, Manipur ah khuallian niin Zo Kutpui a hmanpui. He Zo Kutpui hian ni hnih – February ni 11 leh ni 12 chhung awhin, Mizoram Tourism department leh Zo Kutpui Organizing Committee, Manipur tangkawp buatsaih a ni a. Tourism Minister Pu Robert Romawia Royte chu Functional President niin, Manipur Minister Pu V. Hangkhanlian chu kut thlengtu a ni.


Chief Minister chuan Zofate inpawhtlan zual theihna tura Zo Kutpui buatsaih a ni chu lawmawm a tih thu a sawi a. Zohnahthlak hmun hrang hranga awm te chu tun kan thlen chin atanga hma sawn zel dan tur ngaihtuah pawimawh a tih thu a sawi. Pu Zoramthanga chuan remna leh muanna atana hmalak chu tun dinhmunah a pawimawh thu leh, Manipur a zo hnam hrang hrang zinga remna leh inunauna nghet zawk a awm theih nan theihtawp chhuah a hma a lakpui tur thu a sawi.


Minister Pu Robert Romawia Royte chuan Zo Kutpui chu Zofate insuihkhawmna kawnga phurna pe thar tura Mizoram Sorkar leh khawvel hmun hrang hranga Zofate tanghova hman chho hmek a nih thu sawiin, a hlawhtling hle nia a hriat thu leh rah tha a chhuah zela beisei thu a sawi.


Zo Kutpui lawmnaah hian Manipur Minister pahnih - Pu Letpao Haokip leh Pu Nemcha Kipgente chu khaulzahawm an ni a. Sawm bik hrang hrang Manipur MLA te leh Pu J.C. Ramthanga, Addl. Chief Secretary, Mizoram te atangin thusawi ngaihthlak a ni bawk.


Nimin khan Kawnpui ah hian Manipur a Zo hnam hrang hrang ten inunauna entirnan bung an phun a. He "Unity Tree" hi Chief Minister chuan hnam hrang hrangte chenna hmun theuh atanga lei an lakkhawm chuan a chhilh sak a ni. 


Zo Kutpui hi kumin January thla khan Zampui Tlang, Tripura ah hman a ni tawh a. Bangladesh-a Zofate pawhin kumin March thla chhung hian hmang tura inbuatsaih in, April thla hian Tahan, Myanmar ah buatsaihtum a ni bawk.

Attachment

  • Loading attachment...