Chief Minister Pu Lal Thanhawla chuan tukin zing dar sarih leh a chanve khan Electric Venga Sumo Stand ah Mizoram Faina Beihpui Hnatlang, Clean Mizoram Movement Hnatlangpui a hawng.

Chief Minister chuan vawiin hi ni pawimawh tak a ni tiin, Prime Minister pawhin India ram faina beihpui a hawng mek a ni a ti a. He hunah hian state tin Chief Minister te pawh an remchan dan azirin tel tura sawm an nih thu a sawi a. Hnampa Pu Mahatma Gandhi pawhin faina hi a ngaipawimawh thin hle a ni a ti a. Keini pawhin hetiang beihpui an neih hma hian Clean Mizoram kan kalpui tawh thin a, faina kan duh avang leh faina hi Pathian kan an teuhna ber a ni kan tih avangte in khua leh veng hrang hrangah kan lo kalpui tawh thin a ni a ti a. Chuvangin he movement hi a pawimawh a ni tih kan hriat reng a tul a ni a ti.

Chief Minister chuan daia inthiar mai leh duhdah taka zun mai maite hi hnam mawlzia anih bakah hriselna atan a thalo a ni tih kan hriat a tul a ni a ti a. Prime Minister pawhin sikul naupangte thlenga fai an ngaihpawimawh theihna turin school zawng zawngah hmeichhia leh mipa tan a hrangin inthiarna siam tul a tih thu a sawilang bawk a. He a duhdan hi sorkar pawhin chak takin a um chho ve zel a ni a ti a. Faina nei tur chuan rimchhiate ngaithei lova, a lo thlawna sum senralna zuk leh hmuamah te kan fihlim hmasak a tul a ni a ti a.Vawiina faina beihpui kan thlak hi vawiin atan chauh nilovin hun lokal zel tur thlenga mahni theuh leh kan awmna theuhte vawngfai reng a, India rama fai ber nih kan tum tur a ni a ti. Faina hian hriselna tha a thlen theih avangin vawiin atangin faina hi uar lehzual in i kalpui theuh ang u tiin, Mizoram Faina Hnatlangpui chu a hawng a ni.

Mizoram Faina Hnatlangpui hawnna inkhawm hi Pu Joseph Lalhimpuia, Parliamentary Secretary in a kaihruai a, Ministers, Parliamentary Secretary te, MLA te leh tlawmngai pawl hrang hrang atangin mi thahnem tak an tel a ni.

Clean Mizoram Movement Hnatlangpui hi Mizoram district tinah pawh hman a ni a. Mizoram sorkar pawhin vawiin hi National Cleanliness Day anih angin sorkar office tinte chu mahni office leh a chhehvelte tihfaina ni ah hmang theuh turin a hriattir bawk a ni.