Commissioner of Taxes in a thutchilh tur, Commissionerate of State Tax office building thar, New Secretariat Complex ami chu vawiin khan Chief Minister Pu Lal Thanhawla chuan khuallian niin a hawng. He hunah hian Minister of Taxation, Finance, etc. Pu Lalsawta chu khualzahawm a ni.

Chief Minister Pu Lal Thanhawla chuan chuan chhiah khawn chu ram inrelbawlna atana thil pawimawh tak a nih thu sawiin, chu hna pawimawh tak thawktuten hun rei tak mahni office building mumal nei lova an awm hnu ah hnathawhna hmun tha tak an nei ta chu a lawmpui thu a sawi a. Thawktute pawhin neitu rilru pu in, fai leh thianghlim taka enkawl turin a chah. Chief Minister chuan tuna tax khawnna dan hman mek GST chu thil thar a nih avangin hman tan a nih lai khan inzir chawp tur thil tam viau mahse mumal taka kalpui a ni chho zel chu lawmawm a ti a. Taxation a thawktute pawimawh thu sawiin, sawrkar tha leh thalo tehna chu thui tak an sum lakluh that leh thatloh ah a innghah thu a sawi. Chutihrual chuan chhiah pe tha duhlo leh awl ruk tumte zawn chhuah a, khua leh tui tha annih anga an pek tur dik tak an pek nan a ngaihven zui thlenga an thawk chu fakawm a ti a. Mizoram chu taxpayer tlemna state ni mahse tax tlingkhawm erawh a tam hle a, hei hian Department thawktute thahnemngaihna leh mipui rinawmna a lantir a ni, a ti.

Sawrkar chu mipui tana dawr nuam leh inhawng, langtlang tak leh mawhphurna phur zo tak ni tura hmalak mek zel a niin, hemi atan hian sawrkar hnathawkte chu an pawimawhin sawrkar khalh ngiltu an ni thei a ni, Chief Minister chuan a ti a. Hmasawnna ruhrel tha zawk nei tura hna lo thawh tawh leh thawh mek te chu a nih ang taka hman tangkai a nih nan thawhho a tul thu a sawi a. NITI Aayog zirchianna leh Ministry of Finance tehna atangtea a lan danin Mizoram economy chuan nasa taka hma a sawn thu a sawi a. Chak leh zuala state hmasawn belhchhahtu ni thei turin sawrkar hnathawk kalkhawmte chu a sawm a ni.

Taxation Minister Pu Lalsawta chuan Building thar tha tak Department in a nei chu lawmawm tiin, thawktute mamawh tak leh Mizoram pum tan pawha hmun tangkai a nih thu leh he building sakna kawnga hmalatu zawng zawng chungah lawmthu a sawi. Taxation Department chu Mizoram economy tana a thawh hlawkna chu lawmawm ti bawkin, chhiah khawn dan phung hi sawrkar laipui thupek anga thlak fo ngai thin mah se thawktute inpekna leh thahnemngaihna avangin harsatna awm lovin tluang taka kalpui a nih mai thin bakah chhiah tlingkhawm pawhin nasa taka hma a sawn chho zawk zel chu lawmawm a tih thu a sawi bawk a. Minister Pu Lalsawta chuan Taxation Department hnathawh chu mipui rawngbawlna tha tak a ni tiin, thawktute pawh anmahni dawrtute tan dawr nuam tak leh thahnemngai taka thawk chhunzawm zel turin a chah a ni. 

Commissionerate of State Taxes building hi SPA atangin Rs. 436.53 Lakhs seng a sak niin, chhawng 7 a sang a ni a. Thawh hnih (Phase-I leh Phase-II) a sak niin, Phase-I hi 27.3.2013 khan thawh tan a 16.9.2016 a zawh a ni a; Phase-II hi 5.11.2016 ah tan leh niin 16.3.2018 khan zawh a ni. Commissionerate of State Tax Building-ah hian Aizawl South Zone Office  leh Aizawl West Zone Office a tel bawk a ni.

Vawiin Office thar hawnna inkhawmah hian Principal Adviser to CM Pu R.L. Rinawma leh sawrkar department hrang hranga hotulute an tel a. Programme hi Pu Vanlal Chhuanga, Commissioner & Secretary, Taxation Department chuan kaihruaiin, Pu L.H. Rosanga, Commissioner of State chuan Taxation Department chungchang tlangpui sawina a nei a. Pu Lalmuankima Henry, Chief Engineer, PWD (Building) chuan building thar sak chungchang report pe in, Pu Kapliana Ralte, Addl. Commr. of Tax chuan lawmthu sawiin hun a khar a ni.