Tunlaia ruah sur nasa avanga Serchhip khaw chhung leh a chhehvela chhiatna thleng hrang hrangte chu District Disaster Management Authority chuan a hmunah tlawh kualin a tul anga hmalak zui nghal ngai hrang hrangte an thawk chhunzawm.

Vawiin chawhnu lam hian Serchhip DDMA Chairman leh Bawrhsap ni bawk Pi Sangchhin Chinzah chuan khaw chhunga Village Council hruaitute a office ah a kawm a. Chhiatna hrang hrang thlengah theihtawp an chhuah avanga lawmthu hrilhin, a hmu hmasa leh thleng hmasa an nih thin avangin an pawimawh hle tih a hrilh a. Leimin vanga ei leh bara harsatna tawk thei khuate ngaihtuah ran a nih dan turte sawi a ni.

Pi Sangchhin Chinzah hian Serchhip khawpui Bawlhhlawh paihna (Dumping Ground) kawng NH 54 a pin tak avangin Serchhip khawpui Bawlhhlawhte chu Chhiahtlang khaw bawlhhlawh paihnaah paih rih a nih tur thu a sawi a. NH 54 Sailiam Kawn bula ping chu, a bialtu PWD Highway, Hnahthial Division hotute rawn thlen phei hunah a sawipui tur thu a sawi a. Hriangtlang khaw panna kawng ping mek chu a bialtu PWD lam ten an chan huam chhung an clear nghal tur thu a sawi bawk.

Vawiin hian BCM Serchhip Biak in hnung mual a tawlh reng a. Biakin thlang lama NH-54 kama chengte tan a himlo thei dawna hriat anih avangin UPC Mizoram Pastor Quarters leh an thenawma Pu Saitluanga te bungrua pawh thiar chhuah a ni a. He mual chetna zawna awm Pu Rimawia te chhungkaw chenna in pawh an bungruate thiarchhuah niin nimin lamah an thenawmte an lo inthiarchhuak tawh bawk. Lei che hian NH 54 hi a hnawhpin zel avangin DDMA chuan a hmunah JCB a daha, a tla apiang an hai nghal zel a ni. Tin, helaia NH 54 hi hman atanga lo tlahniam tawh kha a ni a, tun ruah sur nasa ah hian a tlakhniam belh leh nual tawh a. He kawng thlang lama Veng chhung inkalpawhna pawh tukin lam khan a min bawk.

Tukin dar 9 vel bawk khan Sailiam kawn piaha NH 54 leh a chhehvel mual chu nasa takin a min belh leh a, hei hian NH 54 kawng chhuat thui tak a tawlh pui vek avangin hun engemaw chen chu lirthei eng chi mah a kal theih dawn rih loh niin a lang.

Heng chhiatna thlenna hmun hrang hrangte hi Pu Nengthianlal, MCS, Nodal Officer, Disaster leh Pi Vanlalduhi Ralte, District Organiser te chuan a hmunah an tlawh kuala, a tul ang zela Silpauline te pe chhuakin hmalak dan tur an ngaihtuah thin a ni.