Vawiin chhun khan Lunglei Circuit House Conference Hall-ah UD&PA Minister leh Thorang Assembly Constituency bialtu MLA ni bawk Pu Zodintluanga chuan Lungleia Department hrang hrang hotute ko khawmin tun hnaia  ruahsur leh thli tleh avanga Lunglei District hmun hrang hranga chhiatna nasa tak thleng mek chungchang leh chhiatrupna lo thleng thei reng hmachhawn dan tur chipchiar taka sawihona hun an hmang. Meeting-ah hian Lunglei West Assembly Constituency bialtu MLA Pu Chalrosanga Ralte a tel a ni.

Pu Zodintluanga chuan tun hnai fur ruahsur leh thli tleh nasa tak avangin Mizoram hmun hrang hrangah chhiatna nasa tak a thleng mek chu pawi a tih thu sawiin tanpui ngaite leh chhanchhuah ngaite pui turin sawrkarin nasa takin hma a la mek zel a ni, a ti. Lunglei District huam chhungah ngei pawh chhiatna nasa tak a thleng mek a - Lunglawn Veng leiminah mi 10 laiin nunna an chan a, Khawthlang Tuipui lian avangin chhungkaw 700 velin an chenna in an chhuahsan hial a ngaih tak chungchangah Minister chuan heng chhiat tawk chhungkuate a tawrhpui takzet tih a sawi. Lunglei DC Dr Ankita Chakravarty kaihhruaina hnuaiah sawrkar, tlawmngai pawl leh khawtlang hruaitute tangkawpin chhanchhuah leh chhawmdawl hna tha taka an kalpui avanga lawmthu sawiin Minister chuan mipuite innghahna an ni tih hre reng chungin thawhhona tha tak nen chhawmdawl hna chak taka lo kalpui chhunzawm zel turin officer kalkhawmte chu a chah a ni.

UD&PA Minister chuan khuarel chhiatna lo thlengin a nghawng kal chho zel mihring hriselna tichhe thei hri (disease)-te laka mipuite an him theih nan Health and Family Welfare Department hotute pawh tan la zel turin a chah a. Khuarel chhiatna a lo thlenin ‘documentation’ a pawimawh tiin Minister chuan thlalak leh video mumal taka dah tha zel turin a hriattir bawk a ni.

Lunglei District kalpawhna kawng pahnih World Bank Road (Aizawl-Thenzawl-Lunglei Road) leh NH 54 ah te leimin nasa tak thleng mek chuan chhimlam District mipuite tan harsatna nasa tak a thlen theih thu meeting ah hian sawiho a ni a. Haulawng leh Dawn inkar kawng a rang thei ang bera siam a nih theihna tura hmalak dan tur te;  kawlphetha pekchhuah chungchanga hmalak dan tur leh  buhfai, petrol, diesel leh LPG stock awmzat te sawiho a ni. 

Meeting-ah hian Lunglei DC Dr Ankita Chakravarty chuan chhiat tawkte chhanchuah hna kalpui dan leh chhiatna hmachhawn tura Lunglei District inpuahchahna tlangpui a sawifiah a. Chhiatrupna thlena awlsam zawka inbiakpawh theihna tur Satellite phone Sub Division tina nei thei turin hmalak thuai a tum thu a sawi bawk.

 

Attachment

  • Loading attachment...