Khawvel hmun dangte rualin vawiin khan Mizoramah pawh ‘World Blood Donor Day’ hman a ni a, hemi Ni puala inkhawm pui ber chu Aizawl-a Lal Thanhawla Auditorium-ah Health Minister Pu Lal Thanzara hovin hman a ni a. Kumin World Blood Donot Day thupuiah ‘Be There for Someone Else - Give Blood , Share Life’ tih hman a ni a, he hunah hian MYC Chairman Pu Joseph Lalhimpuia chu Khualzahawm niin Health, Police, Sports Department te bakah NGO leh kohhran hrang hrang aiawhte an tel bawk.
Khuallian Health Minister Pu Lal Thanzara chuan damlo thisen mamawhten an hman tur atan mahni taksa atang ngeia thisen sawrchhuaka, midangte tana hlan thin zawng zawngte chu vawiinah hian Mizo mipuiten zahna chibai an buk vek a; Blood Donor Day-ah hian thisen pek hlutna hriaa, hun hlu tak senga lo kal zawng zawngte chu World Blood Donor Day chibai a buk bawk. WHO chuan mi tlawmngai leh inphalte hriain an ngaihhlutawmzia entir nan he Ni hi hun rei tawh tak atang khan a lo hmang tawh a ni, a ti. Thisen mawmawhtute kum tin an pun zel avangin a kum telin thisen mamawhna a sang zel a, thisen pe thinte pawhin ‘kei chu ka pe tawh’ tia duh tawk mai lovin, a tam thei ang ber pe zel turin a ngen a. Thisen thianghlim kan neih zel theih nan leh midangte tana kan luanchhuah zel theih nan kan nunphung tih hrisel nachang i hre deuh deuh ang u, a ti bawk. Thisen pek atangin midangte tana malsawmna ni turin tanla zel ila, blood camp kher nghak lovin, piancham te, pass lawm nan te leh remchan dan ang zelin mimal anga thisen pek i uar zel ang u tiin kalkhawmte a sawm.
Health Minister Pu Lal Thanzara chuan thu a sawi zelnaah damlo mangang thisen mamawn ngawih ngawihtute tan chuan lunghlu leh rangkachak aiin kan thisen a hlu zawk a, chuvangin thisen pek hi a Mizo a, a Kristian em em bawk a ni tih hre rengin a tam thei ang ber pe turin rilru i siam sauh sauh ang u, a ti a, Thisen pek lamah tan la turin mipuite sawm mek laiin Blood Bank lamah duh angin doctor an indaih thei lo chu sorkar ang pawhin thupha a chawi thu sawiin Pu Lal Thanzara chuan MBBS zirchhuak thar engemawzat Contract basis-in rawih tum a nih thu leh hei hian doctor indaihlohna a tihziahawm a beisei thu a sawi bawk.
Khualzahawm MYC Chairman Pu Joseph Lalhimpuia pawhin thusawiin Mizoten ‘pasaltha’ kan tihte chu midangte tana mahni nun thap ngam khawpa huaisen te an ni thin a, tunah chuan damlo thisen mamawhtute tana mahni thisen petute hi kan pasalthate an ni, a ti. Khawvela kohhran thang chak ber chu tum neia hmalam pan ‘purpose driven church’ te an ni tih kohhran zirtuten an sawi a, chuvangin Mizorama kohhran hrang hrang leh thalai pawlte pawhin ‘blood donation’ hi rawngbawlna pawimawh tak a ni tih i hre reng ang u, a ti bawk. Pawl leh kohhran angin thisen pekna runpui (blood bank) neih thin bakah Mizo Kristian kan nihna avang zawkin mimal ang pawha kan tih tur a ni tiin kalkhawmte chu thisen pek lamah tan la sauh sauh turin a fuih.
Vawiina Blood Donor Day inkhawm kaihruaitu leh MSACS Project Director ni bawk Dr.Lalmalsawmi Sailo chuan thisen mamawhtute tana mahni thisen ui lova pe thintute chungah lawmthu a sawi a. Thisen thianghlim a hlu em em laiin thisen thianghlim erawh tur ang a ni tiin Dr.lalmalsawmi chuan Mizoramah chuan ‘thisen pek uar’ ti ringawt lovin ‘thisen thianghlim pek uar’ tia kan sawi a ngai tawh a ni, a ti a. Mizoramah HIV leh hepatitis a hluar mek avangin thisen thianghlim lo te chuan thisen pek loh ngam a ngai tawh zawk a ni, a ti bawk.
‘World Blood Donor Day’ lawmnaah hian kum 2017-18 chhunga Civil Hospital Aizawl leh Durtlang Hospital-a a thlawna thisen pe tha office, NGO, Zirna In leh Kohhran te hnenah lawmman leh chawimawina lehkha Khuallian leh Khualzahawm ten an hlan nghal a. Lawmman leh Citation dawngte chu :-
RELIGIOUS GROUP :
1. Thalai Kristian Pawl (TKP) Coordination Group - 522 Units
2. Territorial Salvation Army Youth (TSAY) - 288 Units
3. Isua Krista Kohhran (IKK) Thalai - 112 Units
YMA BRANCH :
1. Keifang Joint YMA - 164 Units
2. Bethlehem Vengthlang Branch YMA - 144 Units
3 Chaltlang Branch YMA - 126 Units
INSTITUTIONS :
1. Pachhunga University College - 673 Units
2. Govt. Aizawl College - 366 Units
3. Govt. Hrangbana College - 328 Units
MISCELLANEOUS GROUP :
1. Directorate of Sports & Youth Services - 444 Units
2. Inter-College Youth Adventure Club - 135 Units
3. Mizoram Pradesh Youth Congress Committee (MPYCC) - 125 Units
Heng bakah a hnuaia mi ang hian thisen pekna kawnga tithate hnenah ‘Chawimawina Lehkha’ pek a ni bawk :
1. Central KTP - 3536 Units
2. Mizoram Thalai Kristian Pawl - 1856 Units
3. Territorial SAY - 540 Units
4. Adventist Youth - 224 Units
5. Pentecostal Youth Department - 92 Units
6. Diocese Catholic Thalai pawl - 63 Units
7. Lairam Isua Krista Baptist Thalai Pawl - 184 Units
8. NSS Mizoram - 3119 Units
9. Central YMA - 1523 Units
10. Directorate of Sports & Youth Services - 757 Units
11. DGP Mizoram Office - 220 Units
12. MPYCC - 141 Units
13. Zomi Villa - Anni hian thisen mamawh mahse a leina tur sum neilote tana hman tur Blood Bank-ah sum an pe (donate) thin a ni.
