Vawiin khan Association for Voluntary Blood Donation (AVBD) leh District Hospital Champhai tangkawp buatsaihin World Blood Donor Day chu Govt. GM Higher Secondary School, Champhai Vengsangah hman a ni. He hunah hian Pu Liansangzuala Chhakchhuak, Addl DC Champhai chu khuallian a ni a, he ni pual hian  Govt. GM Higher Secondary School NSS ten thisen pek runpui an nei a ni.

Pu Liansangzuala Chhakchhuak chuan thisen hlut zia sawifiahna neiin tunlai thiamna thar ber pawhin thisen a siam chhuak zolo a ni, a ti a.  Thisen chu hnam hrang hrangte thliar hrang bik lova angkhata siamtu a ni tiin, Blood group inang chuan thisen a inhmantawm vek theih a ni, a ti a. Thisen pe tur reng rengin  medical check up tha tak a paltlang phawt angaih thin avangin  thisen pek chu mahni dinhmun hriatfiahna hun tha tak anih thu a sawi bawk a. Blood Donor Day chu thisen petute chawimawina ni anih  thu sawiin, tupawhin englai pawha thisen kan mamawh avangin thisen pek chuan tawp ni a nei thei tak tak dawn loh thu a sawi a. Thisen pek tum kalkhawmte chu World Blood Donor Day hun nuam leh hlawkthlak tak hmang turin duhsakna a hlan a ni.

Dr J.Lalramchhuanga, Specialist, District Hospital, Champhaiin thisen nihphung leh hnathawh dan sawifahin, Zirlaite chu mahni thisen group hre reng thin turin a chah a. District Hospital Champhaiah  thisen mamawhna a kum telin a san zel thu sawi langin, kum 2012 a thla tin Unit 15 hmang thin khan tun dinhmunah chuan thla khatah Unit 100 atanga 120 lai mamawh tawh a ni, a ti a. Taksa hrisel tha tan thisen pek chu hlauhawm anih loh thu sawiin, mipa hrisel tha tan kar 12 dan leh hmeichhe hrisel tha tan kar 16 dan zela thisen pek thin chu a him thu a sawi a. Thisen pek theih hunchhung chu kum 17 atanga 66 thleng niin, a hmaa lo pe tawh tan kum 70 thlenga pek pawh a him thu a sawi bawk a. Kalkhawm Zirlai naupangte chu nun kawng dik zawha, midangte tana rawngbawlna angaia thisen pe thin turin a chah a ni.

He hunah hian Dr R. Lianmawia, SMO, Champhai pawhin a mamawhtu apiangte tana thisen pek chu a hlut thu sawiin, thisen pek chu nunna chhantu, inpekna leh hmangaihna thinlungpua tih thin a ni, a ti a. Sawrkar hmalaknain Zirna In-ahte medical check up tih thin anih thu leh Damdawi In-ah thalaite tana Youth Clinics hranpa siam anih thu a sawi bawk a ni.  Pu VL Chama Hnamte, President, Sub-Hqtrs. YMA Champhai;  Pi Laldingngheti, President, Sub-Hqtrs. MHIP Champhai leh Pu K.Pazawna, Principal, Govt. GM Higher Secondary School-ten a taka thil tawn leh fuihna tha tak tak an sawi bawk a ni.

World Blood Donor Day puala hun hman hi Dr Zatluanga, President, AVBD Champhai & DMS-in a kaihruai a. Pu C. Zaihmingthanga, Secretary, AVBD Champhaiin report  pein he ni puala chawimawina dawngte chanchin tawi a sawi a. Hemi hnu hian chawimawina hun hman chhunzawm a ni a, Kum 2017-2018 chhunga pawl anga thisen pe hnem chawimawina dawngtute chu; Kohhran Thalai huangah  Adventist Youth Federation (AYF) chuan thawhhlawk berin thisen Unit 83 an pe  a. Thisen Unit 54 petu Zotlang Branch YMA chu Branch YMA thisen pe hnem ber an ni a. Zirna In huangah Govt. Champhai College NSS te chuan Unit 105 pein an thawhhlawk ber a ni. Heng bakah hian Special Award hlanna neih a ni bawk a, Tlangsam Branch YMA chuan District chhunga NGO zinga Voluntary Blood Donation Camp buatsaih hmasa ber annih chawimawina an dawng a. New Champhai MHIP Branch-in MHIP hminga Mizoram puma Voluntary Blood Donation Camp buatsaih  hmasa ber an nih chawimawina an dawng a. Thisen Unit 19 petu Chhura Hmun Welfare Association hnenah welfare anga thisen pe hmasa ber chawimawina hlan anih bakah  Department anga thisen petu, District Sports and Youth Services, thisen unit 59 petute chu chawimawina hlan an ni bawk a. Pu PC Lalchuangkima, AVBD Champhai, thisen vawi 59 lai pe tawhtu chuan lawmthu sawina neiin hun a khar a ni.  

Vawiin World Blood Donor Day puala thisen pek runpuiah hian thisen Unit 70 pek niin, Mipa 43 leh Hmeichhia 27 ten thisen an pe a ni.