Vawiin hian CMO Conference Hall Serchhip ah World Blood Donor Day hman a ni a, Pu K. Saitluanga, MIS, DIPRO Serchhip chuan khuallian niin a hmanpui.

Khuallian chuan mihringte leh ransate nunna chu thisenah a awm thu Bible-ah a inziak tih sawiin, hei vang hian midangte nun chhanna atan thisen pek chu thilpek azawnga hlu ber ani, a ti a. Kristian te tih atan thil inhmeh tak anih thu sawiin, thisen pek chu uar deuh deuh a pawimawh thu a sawi.

Pu Zonunsanga Kawlni, President, AVBD pawhin thu sawiin he ni hi khawvel pumah hman thin anih thu leh Serchhipah pawh kum 2012 atang hman tan a nih thu a sawi a. Kum 2020 ah chuan midangte tana thisen pek zawng zawng chu a thlawna pek ni vek tawh tura hmalak anih thu a sawi. Kumin hian AVBD hian Mizorama thisen pek zawng zawng atangin a thlawna pek chu 90% an target  thu a sawi a. Kum kalta chhunga Serchhip Blood Bank-a thisen pek zawng zawng zinga 83.8% chu chu voluntary donation anih thu leh kumin chhung bika Serchhip a thisen pekte chu donation deuh vek a nih mek thu a sawi ani.

Dr. Laldawngliana Sailo, CMO Serchhip pawhin thusawiin, mi hrisel pangngai tan thisen pek a hlauhawm loh thu leh a that zawkna chen a awm thu a sawi a. Kohhran Thalai bakah YMA te leh Sports Association te pawhin tun aia uar zawkin thisen pe thei se a duh thu a sawi ani.

World Blood Donor Day puala inkhawm hi Pu Zolianmawia, Vice President AVBD, Serchhip chuan a kaihruai a. Pu Hmingthansiama, Secretary leh Dr. Maria VL Rosangi, Blood Bank Officer ten report pein; sawrkar kum kalta April ni 1, 2017 atanga March ni 31, 2018 thleng khan Serchhip Blood Bank ah thisen pek zawng zawng atanga unit 179 chu Replacement Donation niin, a thlawna pek (Voluntary Donation) chu unit 1109 ani a, 83.8% a tling a. Tun sawrkar kum kal mekah hian Blood Donation Camp tum 5 huaihawt tawh niin, thisen unit 223 lak a ni tawh a nia, Camp neih mai tur ruahman sa pakhat a awm bawk.

Vawiina he hun hmanna ah hian sawrkar kum kalta chhunga thisen petu pawl hrang hrangte hnenah chawimawina thuziak pek hlan an ni.

 

Attachment

  • Loading attachment...