Ni 12/6/18 a Zawlnuam Borai tuilian tuartute leh a bial chhung hmun hrang hrang a ruahsur nasa avanga chhiatna thleng tlawh kualin Hachhek Bialtu MLA Pu Lalrinmawia Ralte, Political Adviser to CM ni bawk chuan nimin 13/6/18 khan a bial chhung hmun hrang hranga chhiatna thlengte a hmunah a tlawh.

Borai tui lian vang hian chhungkaw 30 chuang In atangin an in thiar chhuak a, Anganwadi, Sub centre leh Middle school-te tui lian hian a chim tel bawk. Borai Bailey bridge, motor a inkalpawhna awmchhun chu tui hian a chim pil vek avangin motor engemawzat a tangkhang hman a. Kanhmun atanga Bazar haw lam khualzin mi 80 vel ei leh in bakah an mutna tur te hi Zawlnuam BDO leh Bawrai YMA te'n ruahmanna siamsakin an lo buaipui a ni.

Hei bakah hian Saikhawthlirah leilet eng emawzat tuiin a chim a, Chuhvel ah In chhia avanga luah ngam loh an awm bakah Baptist biak In pawh leiminin a tichhe bawk.

Bungthuam leh Luimawi khuaah chhungkaw eng emawzat leilet tuiin a chim a, chenna In hlauhthawnawm a awm nual bawk. Tin Kanhmunah pawh lei khi avanga inthiar chhuak chhungkaw 3 an awm bawk a ni.

Bialtu MLA hian tanpui ngaite hnenah Silpouline semin mimal leh YMA hnenah a tul atana an lo hman chawp tur sum engemaw zat a pe bawk a ni.

Kananthar bridge pawh tuiin a len chhia a, an khua hi eng lirthei mah a lut thei lo a, lawngleng hmanga kal a ngai a, an buai hle bawk a ni.

Attachment

  • Loading attachment...