Chief Minister Pu Lal Thanhawla chuan vawiin khan DTO Office Serchhip ah Mizorama a 5-na tur Computer hmanga Rel Ticket Book na, Passengers Reservation System (PRS), Railway Out Agency tia hriat chu a hawng.

Chief Minister chuan Computer hmanga rel ticket bookna Serchhip ah hawn theih a ni ta chu a district pum tan hmasawnna rahbi pawimawh tak a ni a ti a. Hmasawnna hi hmanhmawhpui chi a nilo tiin, hmasawnna kan duh avanga sorkar timualpho zawnga kan nawr thin hi, a hnathawhna sum petu kan nih siloh chuan ringtute tih tur a nilo a ni a ti a. Sorkar kaihza vengtu kan nih hmasak a tul a ni a ti.Chief Minister chuan rela zin hi zau zawka khaw hmuh theihna anih avangin a tha hle a, a district mipuite pawhin an tangkaipui hle a beisei thu a sawi a. Hun lo la kal zel turah Mizote chu India ram hmun zau zawkah tulna hrang hrang vangin kan la kal dawn chauh a, chutiang hunah chuan he PRS hi ala tangkai deuh deuh dawn a ni a ti.

Hmasawnna bulthut, power hnianghnar zawk kan neih theih nan Mizorama lui zawng zawngte chu power siamchhuah nan khuah vek tum anih thu sawiin, tuna Serlui B pawh hi hman tangkai ngei anih theih nan sorkar chuan a siam that nan cheng vaibelchhe 25 chuang a seng tawh a ni a ti a. Kuttling lova sum hmuh duh avanga Tuirial Hydel Project hlamchhiah tak pawh a sorkar chuan tinung lehin, kum 2014 khian hawn theih a beisei thu a sawi bawk a. Inkalpawhna kawngpui National Highway 54 kan neih chhun pawh hi a siam that hna thawk tura central sorkarin contrctor a thlan ten an thawh that leh theih siloh avanga harsatna nasa tak kan tawh phah thu sawilang bawkin, tunah hian thar thawh leh mek a ni a ti a. Serchhip khawpui chhung pawh Chhiahtlang nen khawpui khata dah anih angin, a hranpa a siam that nan estimate pawh siam anih thu a sawi bawk a. Serchhip chu ram laili a awm anih avangin entawntlak hmasawnna siam angai a ni tiin, hetah hian a ram leilung neitu mipuite chu an pawimawh hle dawn a ni a ti.

Hawnna inkhawm DC Conference Hall a neihah hian Transport Minister Pu P.C. Zoram Sangliana chuan Railway Out Agency bun tur hian Mizoram sorkar, Railway leh BSNL te an inpeih rual a tul thu a sawi a. Hmasawnna hian mihringte chenna hi a pawt zim tawh hle a ni a ti.

PRS ah hian ni 90 hmalam atan rel ticket book lawk theih a ni a. Ticket lak tawh cancel leh tur pawhin a ticket keng telin khawi PRS ah pawh cancel man tlemte chawia tih theih vek a ni.

Inkhawm hi Transport Secretary Pu H.Darzika’n a kaihruai a, Northern Frontier Railway atangin B.K.Das, Asst Commercial Manager, Lumding Division leh thawktu officer dang 3 an tel bawk a ni.