Mizorama Cricket Stadium hmasa ber tur, Suaka Cricket Memorial Stadium tih Sihhmui ami chu vawiin khan Chief Minister Pu Lal Thanhawl’n a lungphum a phum.

 

 

Hawnna lungphum inkhawm buatsaihah Chief Minister chuan tuna Cricket Association of Mizoram (CAM) hruaitute thawhrimna leh tumruhna azarah stadium lungphum phum theia an awm a lawmawm takmeuh a ni a ti a. He khelmual tur atana hma an lo lak tawhna avang hian hna chanve zo ang an ni a ti. Pu Hawla chuan Cricket game hi Mizote khelh chi tak nia a hriat thu sawiin, inkhelhna a a vawm leh alo man lampang hi Mizote chemkalna anih avangin a game hi Mizo thalai ten uar deuh deuh se a duhthu a sawi a.  India ah chuan cricket hi pawisa tamna ber game anih avangin CAM hruaitu ten kan thalai te luh ve theihna tura hma an la chu faktlak an ni a ti.

He cricket stadium tur hmun hi a ram neitu Pu Rotluanga’n a pek a ni a, a khelmual - stadium - hi a pa, Suaka hming chawia phuah a ni. CAM in a hnena lawmthu an sawi tihlan nan Chief Minister hi ‘Citation’ an hlan tir bawk a. Associationte tumtuhna avang hian kum 2005 June 23rd khan he khelmual tur kutthlak tan a ni a. Tunah hian zawl zau tak ni tawhin DONER Ministry atangin sum cheng vaibelchhe 11 leh nuai 20 tunhnai khan an hmu leh a ni.

Inkhawm hi CAM Working President Pu K.Lalbiakthanga chuan kaihruaiin, Bialtu MLA Pu Lalduhawma chu khualzahawm a ni. Chief Minister hi a nupui Pi Lalriliani’n a tawiawm a ni.