4276/2024-2025

Dated Serchhip, the 17th February 2025: Vawiin khan Chief Minister Pu Lalduhoma chuan a bial, Serchhip District Hospital-ah he damdawiin tana hman tur Eco Savior Foundation kaltlanga hmuh Samsung V6 Ultrasound khawl thar a hawng a, a lawmna inkhawm Kawnpui VC Hall ah neih zui a ni.

A lawmna inkhawmah hian Chief Minister chuan, sawrkar sum engmah seng lovin ultrasound khawl thar, tunlai thiamna thar ber hmang chi, khawvel huap pawha a tha pawl tling phak kan nei hi kan lawm a. A buaipuitu Eco Savior Foundation, Kolkatta chungah ka lawm em em a ni.

CSR tangkai theihzia hre chiangtu chu Serchhip mipuite kan ni a, vawiina kan sak mek Hospital Building sakna bul ber pawh hi CSR a ni. CSR hi Companies Act dan hnuaia mi, sawrkar sum seng lo va hmasawnna hna tam tak thawh theihna hnar a ni. A hmang tangkai thei tur hian Society emaw NGO, Income Tax 12A & 80G registration nei nih a ngai a. He registration nei NGO kan ngah a, annin thawhpui tur Company an dap chak chuan kan ram tan hlawkna tam tak kan hailut dawn tihna a ni.

Sawrkar chuan a pawimawhzia kan hriat avangin CSR Cell hi Chief Minister Office-ah kan din a. UNDP nena tang dunin Bangalore-ah CSR Conclave te an zu buatsaih a, CSR pe thin Company lian thahnem tak an zu kawm a. Mizorama hetiang lama tui mite pawh ko khawmin Awareness Programme an buatsaih tawh a. Conclave lian tham nei turin an inpuahchah leh mek.

Serchhip damdawiin hi kan theih ang angin kan thuam mek a, kan hman mek Lung enna (ECG) hi, lam hla tak atanga daktawr thiam zawkten live-a 5G connection ngata an rawn enpui theih khawpa khawl tha a ni. Nikum October thla tirah khan Serchhip Hospital-a dah tur 3D Dental Laboratory ka rawn hawng tawh bawk a. Hospital building thar kan sak mek avangin Govt. Serchhip College Campus-ah kan dah rih a. Industrial Revolution 4.0 huanga mi, 5G connectivity technology nei tho a ni. Tin, he 3D Lab kan hawn rual khan Mobile EGC device leh Drip Monitoring System te kan hawng bawk. Building thar kan neih hunah Dialysis khawl pawh rawn dah kan tum dawn a ni, a ti.

Hospital Building thar sak meka harsatna awm te sukiang turin hma kan la zel a. Hospital chauh pawh ni lovin Nursing School tur building sak tawh vawiin thlenga la hman tangkai si loh saw hman theiha siam kan tum a, sawrkar quarters hi Serchhipah kan rawn sak belh nual dawn a, Circuit House pawh Rs. 6 crore senga rawn sak kan tum, tiin hmachhawp hnaivai an neih te a tarlang bawk.

A lawmna inkhawm hi Dr. LP Malsawma, Sr. CMO in a kaihruai a, Pi K. Lalrinkimi, Nursing Officer chuan hunserh hmangin Pu C. Lalrinfela, State Head, Eco Savior Foundation chuan report tlangpui a pe. Samsung V6 Ultrasound hi Rs. 49 lakh zet a ni a, a resolution a san bik avangin a tha bik hle niin a sawi.

A lawmna inkhawmah hian Serchhip District Health & Family Welfare thawktute, official pawimawh te leh khawtlang hruaitute an tel a ni.