Indian Council for Cultural Relations (ICCR) buatsaih, ni 2 awh tur (29 & 30 Aug), India Hmarchhaka hnam 14 thlanbikte lam leh rimawi pholanna ‘Dance & Music Festival’ chu vawiin khan Chief Minister Pu Lal Thanhawla’n Vanapa Hallah a hawng.

Chief Minister chuan he festival pawimawh taka lo tel tura lokal zawng zawngte chu lo lawmin duhsakna a hlan a. India ram zau zawk mipuite hian Hmarchhak hi Assam turah chauh an ngaih thin avangin, state hrang hranga chengte an hriat lohzia a tilang chiang a, hei hian ram inpumkhatna tihchakna kawngah harsatna a siam thei a ni a ti a.Hmarchhak mite pawh hian India ram zau zawkah inphochhuah kan mamawh hle bawk a. Chuvangin ICCR hian ramdang nena  hnam ziaranga inpawhtawnna kawngah hmarchhak mite hi min telh tam ve thei thin se a ti a. Tun dinhmunah Mizote hi ICCR ah an tel khat hle a ni tiin, ICCR Chairman rei tak lo ni tawh thin, Karan Singh a hnenah alo thlen tawh thu leh Prime Minister hrang hrangte hnenah hetiang kutpui hi buatsaih thin se tia a lo thlen tawh thin thu a sawi bawk a. He festival huaihawttu ber Pu Munish Singh, ICCR Regional Officer, Shillong in thahnem ngai taka hma a lakna chu fakawm tiin, Ramdang nena Cultural Exchange Programme neih leh hmasak berah Mizoram cultural troupe telh an nih tur thu a sawi chu Chief Minister chuan a lawmthu a sawi a ni.

Pu Hawla chuan mahni hnam ziarang ngaihhlut a tulzia sawilang bawkin, a thalai te chawi nun zel a pawimawh a ni a ti a. Kan pipute incheidana inchei a rem tawh lo anih pawhin a vawn nun kha kan tih tur a ni a ti.

Khualzahawm Pu PC Zoramsangliana, Minister for Art & Culture chuan Mizo ten Cheraw lama khawvel record kan siam khan culture a kan thanharhzia a tilang a ni a ti a. Mizo nih hi khawiahmah kan zahpui tur a nilo tiin, a department enkawl Art & Culture a miin thil an dil hnem ber chu cultural dress a ni a ti.

Vawiina lam leh rimawi entirtu te hi Zorun, Zofa leh Chaltlang Lily veng cultural club, Mizoram te, Riang hnam, Tripura, Garo leh Khasi, Mehgalaya atang te leh Mishing hnam, Assam atangte an ni.

He kut bultuma huaihawttu ICCR Regional Office, Shillonga Regional Officer Pu Munish Singh chuan ICCR thil tum ber chu ramdang nena cultural relations tha siam a nih thu a sawi a. He festivala tel zawng zawng artistes te hi 250 vel an nih thu sawiin, ni 31 August leh ni 1 September khian Shillonga chhunzawm tur anih thu a sawi bawk.