Vawiin khan Mizoram Iskut Growers’ Association buatsaihin Sihphir Vengthar-ah ‘NLUP Iskut Campaign’ vawi 3-na neih a ni a, Mizoram Law Commission Chairman leh Bialtu MLA ni bawk Pu R.Lalrinawma’n a hmanpui.

Bialtu MLA Pu R.Lalrinawma chuan NLUP hnuaia iskut chingtu turte tan infuihna leh inzirtirna hun tha tak hman theih a nih chu lawmawm tiin thlai leh trade dang thlangtute pawhin entawn se a tih thu a sawi a. Sorkarin mi harsa leh kuthnathawktute eizawnna nghet an neih theihna rahbi a tuksak NLUP-ah hian sum tam tak sen mek leh sen zel tur a ni a, hetianga sorkarin tanpuina a ruahman hi hmang tangkai a, dik tak leh taima taka hmalatute chu an dingchhuak dawn a, hlawhtling lo bik nih hlauh tur a ni, a ti. Sorkarin kawng hrang hranga tanpuina a pek zel theih nan theihtawp chhuah theuh turin a ngen bawk a ni.

Mizoram Iskut Growers’ Association hian Branch 9 a nei tawh a. Tunah hian chhungkua 1400 laiin iskut an ching mek a, kum khat chhung hian iskut hi vawi 10 thar theih a ni. Kumtin Mizorama iskut tharchhuah zat a pung chak hle a, nikum 2010 khan iskut chin nan 1500 hectares  hman niin 59050 quitals tharchhuah a ni.