Aibawk leh Darlung khua inkalpawhna, Tlawng lui kana Darlungkai hmuna lei, BUG Bridge dawh zawh tawh chu nimin khan Chief Minister Pu Lal Thanhawla chuan  a hawng.

Chief Minister chuan  khawtlang leh sorkar thil siam reng reng hi mahni ta anga, neitu rilru pu chunga kan enkawl a tul thu sawiin, he lei pawh hi a neitu bik turte chu Aibawk leh Darlung khua mite an nih avangin a chhiat a thatah mawh la ngam turin a chah a. Ringtu kan nihna hi rim taka kan hman chuan hnam changkang takah kan insiam thei a ni ati a. Tuna kan nihnaah erawh chuan insiam that tur kan ngah hle a ni a ti. Chief Minister chuan he lei, kum tam tak hnua dawh zawh tak hi peihfela hman theih a ni chu lawmawm a tih thu a sawi a. A hmang tangkai turte tan malsawmna anih ngei theih nan duhsakna a hlan a ni.

Hawnnaa khualzahawm, Bialtu MLA Pu Vanlalrobiaka, Chairman,ZIDCO chuan a bial chhung mipui ten he lei hi nasa taka an tangkaipui theihna tur anih  avangin 'Malsawmna Lei' tiin kan vuah a ni a ti.

He lei hi Permanent Built Up Girder Bridge-BUG Bridge-a ni a, Mizoram PWD enkawlna hnuaiah kum 2002 atang khan  dawh tan a ni. A senso hi central sorkar leh Mizoram sorkar intumsem a ni a, Mizoram sorkarin a tum ve tur a remchan thin loh avangin a sak hna hi a rei phah ta a ni. Senso zawng zawng hi cheng nuai 202 a ni a, a contractor hi M/S Buildworth Pvt Ltd, Guwahati an ni. A sei zawng hi running metre 67 niin, avang lam hi 3.30m a ni a.  Metric tonne 20 a rit dawlzo tura sak a ni.

Hawnna inkhawm hi Pu Lianchungnunga, CE, PWD (Highway) in a kaihruai a. Chief Minister hi I & PR Minister Pu Zodintluanga, Social Welfare Minister Pu P.C.Lalthanliana leh MLA engemawzatin an tawiawm a, PWD Engineers te an kal thahnem hle bawk.