Nimin tlai khan Indian Oil Company Ltd. aiawhten Food, Civil Supplies & Consumer Affairs Minister Pu H. Rohluna chu a office-ah kawmin Mizorama hma an lak theih dan tur chungchang an sawipui.

Nikum lam atanga Railfed POL Depot Sairanga dah tura Minister-in hma a lo lak tawhna bawhzuia lo kal an nih thu sawiin, he depot siamna hmun tur enfel tura IOC-in Land Selection Committee a siama member tel te an nih thu an sawi bakah thil awm dan leh hma lak zel an tum dante Minister hnenah sawifiahin, ram awl remchang awm thei ang ang te ruahman saka chak taka hma lak sak turin Minister hi an ngen nghal bawk a, IOC hotute hian oil depot mai bakah eirawngbawlna gas (LPG) lama hmasawn lehzuala thawh tel an duh thu pawh sawi telin heng atan hian Company lam chu an inpeihfel tawh a, a bul tanna tur Sawrkarin ram a pek veleh hna pawh an thawk tan nghal thei dawn a ni tih an sawi. Minister pawhin IOC hotute hnenah hian hma a lo lak tawh dan te sawiin a theih ang anga hma lakpui zel a tum thu  a sawi a ni.
Vawiin chawhma khan IOC aiawhte, Railway Task Force aiawhte leh Food, Civil Supplies & Consumer Affairs Department hotute hi inkawm khawmin IOC Oil Depot chungchang pawh hi an sawiho nghal a, hemi zawh hian Sairanga a hmun enfel turin an kal nghal a ni.

Guwahati atanga lo kal IOC Land Selection Committee member te hi Senior Managers B.K. Sharma, S.K. Das leh U. Tamuli te an ni.