Dawrpui Multi Purpose Centre tur lungphum vawiin khan Chief Minister in Aizawl Civil Hospital chhim lama, Doctor te leh Nurse’s Quarter inkara hmun awlah a phum. Hemi hmuna building sak lailawk, Cheng nuai 5,95,665/- senga sak pawh a hawng nghal.

Chief Minister chuan he multi purpose centre tur hi Dawrpui tan chauh nilo, Mizoram mipui tana hun rei tak atanga Dawrpui khawtlang ina alo nawr tawh, a hlawhtlinna hmel hmuh theiha a awm ta chu lawmawm a tih thu a sawi a. Ram buai avangin thingtlang mi tam tak Aizawlah an pem lut a; chuvangin Aizawl khawpui chu Plan mumal awm lovin kan in ekbeng chhova, Dawrpui hi veng tawt ber anih phah ta a ni a ti a. Khawpui tawt lutuk tih ziaawm nan, an hun hmasa lamah tuna Millenium Centre awmna hmunah hian Multi purpose building sa a, shopping arcade te, conference hall te, exibition hmunte, underground parking na te leh intihhlimna hmunte awm tura ruahmanna an neihte chu mi hausa in a lo ni ta a, a pawi hle a ni, Pu Hawla chuan a ti a. Chumi thlak tura Dawrpui multi purpose centre lo awm tur chu a lawmawm hle a. Chutih rualin sum awmsa a awm loh thu sawiin, Chief Minister chuan plan te siam a, DPR te Central sorkarah la thehluh a ngai dawn a ni a ti.

Chief Minister chuan he multipurpose centre ina a tum, civil hospital a khual khaw mi thi an awma lo sawngbawlna hmun atana hman leh hmun thengthaw (open space) siam chu tha a tih thu a sawi a.Aizawlah hian green area kan mamawh hle a ni tiin, Pu Hawla chuan veng tinah open space awm thei se a duh thu a sawi a ni. Aizawl khawpui laili bera Civil hospital awm hi bawlhhlawh lian tak ang a ni tiin, hun lokal zelah Falkawn lama la sawn tum a ni a ti a. Helai hmun hi chu nau neihna hmun atan leh trauma centre atan hman a ni ang a ti.

Bialtu MLA Pu Lalsawta, Minister for H&TE etc chuan helai hmun hi a hriat chian thu sawiin, Dawrpui tan chauh nilo, Mizoram tana mamawh a ni a ti a. Chutiangin Dawrpui khawtlang pawhin an mahni tan chauh an ti lova, pass neih pawh an tum lova, hospital hnathawktute tan harsatna siam an tum bawk lova, Mizoram mipui tana an tih a ni tih a hriatchian thu a sawi bawk a ni.

Lungphum phum inkhawm hi Dawrpui Local Council Chairman Pu Zosangzuala’n a kaihruai a. Dawrpui veng chhung mi Pu John Rotluangliana, Dy Speaker leh Aizawl Municipal Council Chairman Pu C.T.Zakhuma te pawh an tel a ni.