Home Minister leh Bialtu MLA ni bawk Pu R.Lalzirliana chuan vawiin khan Range Officer’s Complex, Seling-ah Environment & Forests Range Office-cum-IB sak thar a hawng.

IB hawnna inkhawm Aizawl DFO Pu V. Lalfala kaihhruaiah Pu Lalzirliana chuan thu sawiin tunhmain Forest Department IB a tam thin a, amaherawhchu sum indaihlohna avangtein cheithat leh cheihnum hleih theih an ni lova, vawiinah Seling-ah IB thar tha tak, zinmite leh mipuite tan pawha chhenfakawm tur IB hawn a nih thei ta chu a lawmawm hle a ni, a ti. E&F Department te hmalakna leh hnathawh fakin Home Minister chuan nungchate leh ramngawte hi kan ram ti nuamtu leh timawitu an ni a, kan humhalh leh duat a pawimawh a ni, a ti bawk. Forest Department chauh ni lo, Mizoram mipui zawng zawngte chu kan ramngaw humhalh leh enkawl hi kan mawhphurhna theuh a ni tiin Minister chuan kalkhawmte a chah a ni.

Seling-ah hian kum 1978 khan Inspection Bungalow hi Assam type-in sak a lo ni tawh a, a hlui tawh leh a chhiat tawh avangin luah tlak a ni tawh lova, thiah a ni ta a. 13th Finance Commission atanga sum hmuh Rs.12.6 lakhs sengin Bungalow thar hi sak leh a ni ta a ni. 13th Finance Commission atang hian Environment & Forests Department hian Mizoram hmun hrang hrangah infrastructure tha tak tak a lo siam thar tawh bawk a ni.

Vawiina IB hawnnaah hian Seling R.O. Pu Lalrinliana bakah Sairang R.O. Pu Rongura Hrahsel, Saitual R.O. Pu C.Vanlalrema, Sadar R.O. Pu Lalfela, Seling-a sorkar office aiawhte leh Seling VCP Pu Lalnunthara te an tel a ni.