Meeting pawimawh tak taka tel tura New Delhi a cham mek, Chief Minister Pu Lal Thanhawla chuan nimin khan internal security meeting a Chief Minister te intawhkhawmna a tel zawh hnuah, Prime Minister Dr.Mammohan Singh hmuin Mizoram hmasawnna te a sawipui a. Chhingchhipa Sainik School din tur lungphum rawn phum tura a sawmna chu remtiin, a ni tur erawh la ruatfel nise an ti a ni.

Nizan khan Chief Minister hian Finance Minister Pranab Mukherjee chu a chenna inah hmu bawkin, Mizoramin sum lama harsatna a neihte sawi dunpuiin, a theihna apiangah tanpui alo tiam a ni.

Tukin zing khan UPA Chairperson Pi Sonia Gandhi nen minute 25 vel chhung inkawmna neiin, Mizoram sorkarin hmasawnna hna a thawhte an sawidun bakah, Hmarchhaka politics dinhmun tlangpui an sawidun bawk a. Pu Hawla sawmna angin a remchan hun hmasa berah Mizoram rawn tlawh a tiam bawk a ni.

Chief Minister hian Arun Jaitley pawh a chenna inah vawiin chhun khan hmu bawkin, Cricket Association of Mizoramin affiliation a hmuh ngei theihna turin theihtawp chhuah alo tiam bawk a ni.