New Delhi a cham mek Chief Minister Pu Lal Thanhawla chuan nimin tlai khan New Delhi Chanakyapuri a Mizoram House sak thar, Rs.20.65 Crore senga sak chu a hawng.

Chief Minister chuan he Mizoram House sakna tura sum petu Central sorkar chungah lawmthu a sawi a. Hetianga tha tak maia sak leh hawn theiha a awm chu a thawktute inpekna vang a ni a ti a. Keini a chhawrtu turte hian neitu rilru pua, fai tak leh dim taka hman leh enkawl hi kan tih tur a ni a ti.

Hawnna inkhawmah hian Pu C.L.Ruala, MP (LS), Pu Lalhmingliana,MP(RS) te pawh an tel a. An ni bakah hian central leh Mizoram sorkar mi pawimawh tak takte an tel bawk a ni.

New Delhi, Chanakyapuri a Mizoram House, kum 1984 a sak tawh kha kum 2007 June thla khan chhan hrang hrang avanga thiah a ni a. Tuna sak thar tak hi a architectural design hi New Delhi mi Vipin Gupta Architectural Consultant ina a duan a ni a, a structural design hi Mizoram PWD siam a ni ve thung a ni. A tira senso tura ruahman, Rs.14.32 Crore angin Engineering Project (India) Ltd in kum 2008 June thla atang khan sa tanin, October 2012 a zawh anih khan senso hi Rs.20.65 Crore ah revised a ni.

Mizoram House sak thar hi Mizopa chhiara chhawng 4 niin, basement a awm bawk a. Mi 39 thlen theihna tur niin, VVIP leh VIP te tan bakah Resident Commissioner Office atana ruahman a ni a, staff quarters leh dormitory a awmlo a ni. A building hi RCC frame structure a ni a, kawngkhar te hi electronic card lock system vuah vek a ni a, tukverhte hi alluminium glazing frame vuah vek a ni bawk a. VVIP leh VIP room chhuatte pawh Italian marble leh hard wood flooring hman a niin, guest room ah laminated wood flooring hman a ni bawk a ni.

A building-ah hian air condition system, kang thelhna hmanrua, solar water heating, water treatment plant, electrical sub station, diesel generator-320 KVA, lift mi 10 chuan theihna, CCTV -inchhungah leh pawnah, WIFI system te dah an ni. Heng bakah hian leihnuaiah tui litre nuai chuang dah khawlna siam a ni bawk a. Room tinah TV set leh mini refrigerator dah a ni bawk a ni.