Kumin Chapchar Kut lawmna chi khat atana I & PR buatsaih Painting & Photo Exhibition chu vawiin chawhma khan Vanapa Hall bathlar-ah Parliamentary Secretary to CM Pu Lal Thanzara’n a hawng.

Exhibition hawnna hi I & PR Director Pu Jim K. Chozah chuan a kaihruai a. Exhibition hawngtu Pu Lal Thanzara chuan mithiamte kutchhuak thlalak leh lemziak hrang hrang te hian mihring nun a ti hlim thin a, beiseina tharte a pe thin a, state pawn hmun zau zawkah te pawh phochhuah tlak vek an ni a ti. Thangtharte zingah thlalak leh lemziak lama mithiam tak tak inthupte hi tun aia nasa zawka lo penchhuak tur leh Mizoram leh a mi chengte pianhmang chi hrang hrang nasa lehzuala phochhuak thei turin a fuih a, sorkar pawhin an hmakhua atan ngaihtuahna a seng ve reng a ni, a ti bawk.

Lawmthu sawitu I & PR Jt. Director Pi Lalnithangi chuan Mizoram sorkar-in visual art  leh lemziak thiamte tana hmakhua a chhawpchhuah mek dan leh helam tuipuitu Parliamentary Secretary to CM chungah lawmthu a sawi a ni.

 Exhibition-ah hian thlalatu mi 24 te thlalak 54 leh lemziakthiam mi 34 te lemziah 85 phochhuah an ni a. 
Thlalak leh lemziak hrang hrang pholante hi March 2 Inrinni thleng a duh apiang tan man chawi loa entheih an ni ang a, pholante hi man man taka hralh theih an ni bawk.