Sorkar laipui hnuaia Ministry of Youth duhdan zulzuiin ni 2 chhung awh tur chu Mizoram NSS bultumin vawiin khan I & PR Conference Hall-ah Sports & Youth Services Minister Pu Zodintluangan a hawng.
He training hi Mizoram chhunga political party hrang hrang atanga hmeichhe lam hruaitute leh tlawmngai pawl zinga hmeichhia aiawhte tana buatsaih niin a hawnna hun hi Dr. Lalzuiliana, State Liaison Officer, NSS chuan a kaihruai a ni.
Hawnna thuchah sawiin Sports & Youth Services Minister Pu Zodintluanga chuan tunlai khawvel ram changkang apiangah hmeichhiate tha thawh, sorkar leh tlawmngai pawl angah te namen loin a pung a, dinhmun pawimawh tak takte pawh an luah tam sawt hle a ni, a ti. Mizoramah pawh hian hmeichhiate dikna leh chanvo humhalh chunga mawhphurhna sang zawka an theihna leh thiamna hman tangkai chu sorkar leh tlawmngai pawl te pawhin an dah pawimawh sawt hle a, kum 2010 November thlaa Aizawl Municipal Council aiawh tur thlanna ah te a hnulama Village Council hrang hrang inthlanna ah te pawh hmeichhiate atanga mawhphurhna la thei tam tak an lo awm ta a ni a ti. Pu Zodintluanga chuan Mizo khawtlang nunah hmeichhiate chu engti kawng maha thlauhthlak leh enhniah an nih ngai loh thu sawiin anmahni duhthlanna leh kawngzawh turah te chuan a vantla ring mai lova an theihna leh tlinzia inhriaa mawhphurhna zau zawk la ngam zual zel turin a fuih a ni. Hmeichhiate tun aia dinhmun pawimawh zawka hlankai na tur kawnga hetiang training mithiam hrang hrangte hmanga buatsaih chuan Mizoram leh a mi chengte tan rah tha a chhuah ngei a beiseipui thu Minister chuan a sawilang bawk.
He ni hnih chhung training turah hian mithiam thlanchhuah Prof. Lianzela, MZU; Prof. T. Vanlaltlani, ATC; Prof. Zokaitluangi, MZU leh Prof. Lalrintluanga, MZU ten thupui thlan chhuah hrang hrang hmangin an zirtir anga sawihona hun leh ngaihdan inhrilh tawnna te nen hun hman a ni ang
