Vawiin chawhnu dar 1.00 khan Chapchar Kut 2013 Organising Committee chuan an Chairman leh Art & Culture Minister ni bawk Pu P.C. Zoram Sangliana pisa-ah inbuatsaihna kalpui dan thlirin meeting hnuhnung an nei a. He meeting-ah hian sawrkar Department hrang hranga mawhphurtute leh Doordarshan, Aizawl aiawh te, CYMA te, Mizoram Cultural Organisation te, MHIP aiawhte an tel a ni.

 Chairman Pu P.C. Zoram Sangliana chuan, “Chapchar Kut hi Mizo zawng zawngte Kut a ni a; kan zavaiin a neitu vek kan nih avangin hlim tak leh hlawhtling taka kan hman theuh theihnan chanvo neite chauh ni lovin, mipuite pawhin kan hlutsak a pawimawh a ni” a ti a. District khawpui hrang hranga Chapchar Kut hmanna tura cheng nuai khat Organising Committee-in a ruahmansak chungchangah Art & Culture Minister chuan, “State dangte hi chuan an ram khawpui berah a ropui thei ang berin an hmang mai thin a; chutiang chu Nagaland-a Hornbill Festival an hman thin dan pawh a ni. Keini erawh chuan Aizawl-ah chauh ni lovin, district khawpui zawng zawngah pawh he Chapchar Kut hi sawrkar leh tlawmngai pawl hrang hrangte bakah, mipuite nena tanghova hman hi tha kan tih avangin ruahmanna kan siam a ni, a ti

Chapchar Kut hi Aizawl-ah chuan 28th Feb leh 1st March, 2013 khian AR Ground-ah hman a ni dawn a. Ni hnih chhung hian Mizo hnam lam chi hrang hrang te, Mizo infiamna te, zai leh rimawite, fashion show te, costume parade te ruahman a ni dawn a. Hengte bakah hian a duh apiangte tel theihna turin Mizo sairawkherh inperhsiak te, kawi inkahsiak te, kawi hnawkte buatsaih a ni dawn a. Chapchar Kut pual hian Assembly Annexe hnuaiah flower show a awm ang a; Vanapa hall-ah lemziakte leh thlalakte 26.2.2013 atang hian phochhuah a ni bawk ang. Chapchar Kut-2013 lawmnaa Central YMA-in chanvo a pek YMA Branch zawng zawngte chu ni 2 chhung hian A.R. Ground-ah kim ziah tura hriattir an ni.

 Chapchar Kut lawmna ni hmasaah hian Mizoram Larsap chu Khuallian tura beisei a ni a; Home Minister Pu R. Lalzirliana chu Kut Pa a ni ang a; Art & Culture Director Pu Ngurbiaka chu Kut Thlengtu a ni ang. A ni hnihnaah hian Union MoS for Tribal Affairs Pi Rani Narah chu Khuallian a ni ang a; Art & Culture Minister Pu P.C. Zoram Sangliana chu Kut Pa a ni ang a; Art & Culture Secretary Pu R. Lalvena chu Kut Thlengtu a ni ang.

District hrang hranga Chapchar Kut -2013 lawmnaah hian hetiang hian Kut Pa turte ruat an ni :

Lunglei                :            Pu R. Romawia, Speaker, Legislative Assembly

Saiha                   :           Pu Hiphei, Chairman, MADC

Lawngtlai              :          Pu S. Laldingliana, Parliamentary Secretary

Serchhip               :          Pu Joseph Lalhimpuia MLA, Vice-Chairman, Lunglei HPC

Champhai             :          Pu Lalrinliana Sailo, Health Minister

Kolasib                 :           Pu S. Hiato, Tourism Minister

Mamit                 :           Pu V.L. Robiaka MLA, ZIDCO Chairman