Mizoram Legislative Assembly Speaker Pu R Romawia chuan Mizoram-in a mamawh bulpui ber chu rilru siam dik ‘moral reformation’ a ni, a ti. He thu hi Apollo School of Nursing in an zirlai thar 30-te thutiam lakna Capping and Lamp Lighting Ceremony vawi 8-na, Tourist Lodge Chaltlanga vawiina an neih a hmanpui tuma a sawi a ni.
Speaker Pu R Romawia chuan kan ram tichhetu te chu mahni hna a inpekna leh tuina tak tak tel lova sum uma hna thawk thin te hi an ni, a ti a, kan ngaihsan zawng leh duh zawng te hlutna suma kan teh chuan kawng diklo kan zawh mek a ni, a ti. Tlawmngaihna, huaisenna, inpekna, thahnemngaihna leh midangte tana rawngbawlsak duhna thinlung nen ram leh hnam kalpui a tul tiin Mizo nunze mawi pi leh pute nuna bet tlat thin kha tunlai thangtharte hian kan vawn nun thar leh a pawimawh a ni, a ti. Pu R Romawia chuan Nursing zir tura thutiam la thar zirlai te chu an thutiam ang ngeia midangte tana rawngbawltu, chhungkua leh ram tana chhenfakawm, rinawm leh chhel taka inpekna nen midangte tana malsawmna an nih ngei a beisei thu a sawi a. Nurse te chu indona hmunah pawh ral leh tual thliar chuang lova hliam tuarte enkawltu, a mamawhtu apiang tana rawngbawlsaktu an nih avangin hna ropui leh zahawm tak thawktu te nia a ngaih thu Speaker chuan a sawi a ni.
He huna khualzahawm North East Consultancy Services-a Chief Managing Director Pu Robert Romawia Royte pawhin thu sawiin engkawngah pawh hlawhtling tur chuan dikna leh taihmakna a kalkawp a ngai a ni, a ti a. Ram changkang apiangah doctor leh nurse mamawhna a sang tih sawiin India ram hmun dangah leh ram pawnah hna tam takin a hmuak tih hria a taima taka zir turin zirlai te a fuih a ni.
Apollo School of Nursing hi Sacred Heart Society hnuai-ah 2005 khan din a ni a. Zirlai tharte lukhum khumtirna leh thutiam lakna hi vawi 8 an hmang tawh a ni. Kum tin naupang 30 lak theihna seat an nei a, he Institution atang hian nurse zir chhuak 90 chuang an awm tawh a ni. Vawiin Capping and Lamp Lighting Ceremony-ah hian kum kalta-a Mizoram Nursing Council hnuaia 1st year, 2nd year leh 3rd year GNM exam-a tithate hnenah lawmman Speaker Pu R Romawia’n a hlan a. He Institution hian 2012 MNC 1st year exam-ah 4th position, 2nd year-ah 3rd, 4th leh 6th position an hauh a ni.
