New Delhi a cham mek Chief Minister Pu Lal Thanhawla chuan vawiin khan Prime Minister Dr.Manmohan Singh hmuin inkawmna hun tha an nei.

Chief Minister chuan Mizoram Sorkar flagship programme NLUP chu Prime Minister tanpuina leh tuipuina avanga Mizoramin hmasawnna a hmu chho mek thu hrilhin, a chungah lawmthu a sawi a. Hlemhletna (corruption) nuaibona kawnga sorkar hmalaknaah 100% chuan hlawhtlinglo mahila, a tlem phah tawh hle a ni tih a hrilh bawk a. Prime Minister pawhin lawmpuina thu sawiin, duhsakna a hlan a ni.

Pu Lal Thanhawla hian sum harsatna tlangpui pawh sawipuiin, Dr.Mamnmohan Singh chuan a theih anga tanpui a duh thu a hrilh a. Tuivai Hydel Power Project 210 MV pechhuak thei tura hmalak mekah Viability Gap Funding (VGF) chungchanga harsatna awm chu Chief Minister chuan sawipui bawkin, Dr. Singh chuan lo enpui a tiam a ni.

Chief Minister hian Kuki National Organisation leh sorkar inkara remna a awm theih dan tur Prime Minister hi a sawipui bawk a. Naga buaina chungchangah Prime Minister Dr.Manmohan Singh hian Chief Minister Pu Lal Thanhawla chu ngaihdan a neihte a zawt bawk a ni.

Chief Minister hian Dr.Manmohan Singh chu Mizoramah zin tura sawmin, Dr. Singh chuan Parliament Session zawhah lo zin a tum tur thu a hrilh a ni.