2912/2024-2025

Dated Aizawl, the 8th November, 2024: Vawiin khan Chief Minister Pu Lalduhoma chuan Secretariat Conference Hall-ah Minister of State Prof. Lalnilawma enkawl department; Horticulture, Rural Development leh PHE department te hnathawh thlirpuina a nei.

Chief Minister chuan, department te hna thawh tha lo emaw an chak lohna hmuhchhuah tuma review meeting ko kan ni hran lo va. Department te hmalak dan hriatpui a, thawhhona tha zawk neih leh kan harsatna tawh mek te inhriatsakna atan te, hmasawnna chak zawk a awm theih nan tea ti kan ni. Kan tumna a rei tawh a, vawiinah a bul kan tan thei ta a, a hlawk ka ti hle. Harsatna in neih te in rawn sawi zel dawn nia. Minister fel leh chak tak enkawl in ni a, in hmalakna te pawh a tha tlang hle tih ka hmu a ni, a ti.

A hmasa berah Horticulture Department hmalakna enho a ni a. Handholding Scheme hnuaia thlai thar lei tur thlan chhuah pali zinga pathum hi Horticulture hnuaia mi a nih anga an inbuatsaihna leh an hmalakna dang te chipchiar takin Chief Minister hmaah an tarlang. Horticulture department hian an hmalakna zawng zawng Handholding Scheme hnuaia luhpui (converge) vek a nih tur thu an tarlang. Kum khat kal ta chhung khan an department hnuaia loneituten Dragonfruit atangin Rs. 6.96 Crore, Balhla atangin Rs. 4.17 Crore, Lakhuihthei atangin Rs. 2.52 Crore, Tomato atangin Rs. 5.74 Crore, Dawnfawh atangin Rs. 3.49 Crore leh Zikhlum atangin Rs. 6.57 Crore vel an tharchhuak niin an sawi.

Rural Development Department te hnathawh enhona neih chhunzawm leh a ni a. Programme lian tham panga an thawh mekte dinhmun Chief Minister hmaah hian presentation an pe. Tun sawrkar kum kal meka ni za inhlawhna an kalpui dan te, Project Rotling an kalpui mek dan te, Social Audit Unit hmalak dan te, MzSRLM hmalakna te, SIRD & PR hmalakna te, BADP hmalakna te, RD department dinhmun te, Vibrant Village Programme lokal tur te, RMIS leh an hnathawh dang te chu chipchiar takin an tarlang a ni.

Hemi zawh hian Public Health Engineering Department hmalakna te enho leh a ni a. PHED hian JJM hnuaiah Water Supply Scheme 852 an kalpui a. An zinga 657 hi gravity hmanga lak a ni a, 188 hi solar pump niin Grid power pump 7 a awm bawk. Heng zinga 832 hi physical complete tawh niin hna kal mek 20 an la nei. NABARD fund atangin Water Supply Scheme kal mek 11 an nei bawk.  SASCI hmanga hmalakna te,  NESIDS fund hmanga hnathawh mek te, Aizawl, Lunglei, Mamit leh khawpui danga tuilak hna an thawh mek te, Tawi tlang tuihna gravity hmanga thawh mek te, Swatch Bharat Grameen hmalakna te pawh chipchiar takin Chief Minister hmaah hian an sawi a ni. Cyclone Remal an tawrh nasat thu leh Aizawl tuilak pawhin ngai a la awh theih loh thu an sawi bawk.

Heng department pathum te vawngtu Prof. Lalnilawma chuan, Chief Minister-in a lo sawi tawh thin angin review committee a han nei tan a. A hmasa ber atana ka department enkawlte min han neihpui hi ka lawm hle a ni. He meeting hian kan hmalak zelnaah rah tha tak a chhuah ngei ka beisei a, a thurawn te chu chak taka bawhzui zel kan tum dawn a ni, a ti.

Chief Minister hi Pu TBC Lalvenchhunga, Adviser to CM, Pu Vanlaldina Fanai, Commissioner & Secretary to CM, GAD leh CM Office-a officer te, Planning & Programme Implementation official pawimawhten an tawiawm a ni.