Chief Minister Pu Zoramthanga chuan nimin khan Delhi Mizo Zirlai Pawl (DMZP) chuan a din Kum 60 na champha leh kumin atana zirlai kal tharte inhmelhriatna leh inlawmna hun (Freshers Orientation and Social, 2019) an buatsaih chu Mizoram House, Vasant Vihar, New Delhi-ah khuallian niin a hmanpui.

Chief Minister chuan thu sawiin Delhi-a Mizo zirlai awmte chu hnam darthlalang, Mizoram hmel lanna pawimawh tak an nih thu a hrilh a. An zirlaiah theihtawp chhuah tura  fuihin, Mizote chu India hmarchhak mai ni lo India ram pumpuiah hmahruaitu an ni thei tih chu vawng reng turin a chah. Pu Zoramthanga chuan Mizoram vanneihzia sawiin, "Pathianin boruak nuam tawk tak, ruahtui tam tawk leh thlai engpawh ṭhat duh em emna ram min pe a; tin, a chhunga chengte pawh ṭawng khat hmang, sakhaw khat vuan kan nih avangin kan inpumkhatna a ṭha bik a. Lei chhungril hausakna lamah pawh tuialhthei leh Gas hai chhuah tur tam tawk tak a awm niin a lang," a ti a. Chung malsawmna te a nih ang taka hman tangkai thiam chu Mizote kutah a tlak thu a sawi.

Mizo hnam chungchang sawiin Chief Minister chuan hnam humhalh chu mitin mawhphurna a ni a ti a. Chutihlai chuan sum leh pai leh ei leh bara intodelh lo tan chuan hnam thinlung nghet taka put thenkhat tan a har ṭhin avangin ei leh bara intodelh chu sorkar ngaih pawimawh ber a nih thu a sawi. Chumi atan chuan sorkarin Socio Economic Development Programme chu chak tak leh a ṭha thei ang bera kalpui a tum thu a sawiin Chief Minister chuan chaw a intodelh bakah Rua leh Mau hmanga nasa taka hmalak tum a ni a ti a. Zirlaite chu ram, hnam leh sakhua chhuan tlak kan neih zel theih nan an nitin nunah Pathian hre reng tur leh Zonunmawi nunpui zel turin a chah bawk.

He inkhawmah hian Delhi a Mizo zirlai ṭhahnem tak an tel a. CM hi Dr.C.Vanlalramsanga, Planning Secretary leh David Lalthantluanga, Addl.R.C, New Delhi leh CM Private Secretary Pu Lalhmansanga ten khuallian hi an ṭawiawm a ni.