Chief Minister Pu Lal Thanhawla chuan nimin tlai khan East Bungtlang ah Mizoram Rural Bank (MRB) Branch, Mizorama MRB Branch 78-na a hawng. MRB branch thar hi East Bungtlangah vawi hnih hawnna a ni a, kum 1980 chho vela MRB in a hloh zawng zela a kal avangin kum 1988 khan MRB branch 18 tih tawpa ni a; chumi zingah chuan  helai hmuna branch lo ding tawh chu tih tawp zingah  a tel a ni.

 Hawnna inkhawm Bank kawttuala buatsaihah Chief Minister chuan East Bungtlangin MRB an nei leh thei chu a lawmawm hle a ni a ti a. Mizo ten hun rei tak chhung bank pawimawhna kan hrelo a, kan hmang tangkai thiam  thin lo a ni a ti a. Bank te hi mipui tana tangkai tur chuan mipui ten thawhchhuah kan neih angai a, bankah dah thain kan khawl tur a ni a ti a. Hengte hi bank chuan mipui tan hamthatna siam ve in kan in chhawr tawn thin a ni a ti. Chuvangin Bank hi mipui ten tangkaipuia chhawr tangkai hle turin khaw mipuite leh khaw thenawma chengte chu a chah a. Sorkar atanga hlawh la te pawhin bankah hian dah thin turin a ngen a, sum kan dah khawl te hi kan mamawh phuhruk nan leh in tha tak sak nan te a hman theih a ni a ti. Bank atanga loan kan lakte pawh tha taka rulh chu kan tih makmawh a ni tih hria a, midang loan la ve duhte tan kawng kan hawn sak phah thin a ni Chief Minister chuan a ti. MRB hotuten mipui mamawhna hria a helaiah branch thar an hawng leh chu lawmthu a sawi a ni.

 Chief Minister chuan khaw mipuiten buh leh bal an chinte, sum chang thei thlai an chin te tha taka an puitlinna turin, sik leh sa leh boruak tha an mamawh te an hmuh theihna turin thing leh maute, ramngaw te, tuihna leh nungcha te tha taka humhalh tlat thin turin a chah bawk a ni.

 East Bungtlang VCP Pu P.C.Saizingah chuan Chief Minister hmalakna avanga an khuaah MRB branch hawn leh a ni chu lawmthu a sawi bawk.

 MRB branch thar hawn takah hian thawktu Manager leh mi pahnih dang dah nghal a ni.

 Mizoram Rural Bank hian kum 2000 hmalam khan hlawkna an nei ngailo a, hloh zawng hlira an kal avangin branch 18 lai tih tawp a ni nghe nghe a. Kum 2006ah recruitment tharte siamin,  kum 2009 khan leiba an neihte (liability) an rul fai thei chauh a ni. Kum 2011 atangin hlep an nei chho tan a, tunah hian bank hmasawnna tehfungah 'Categoy II' ah awmin, an credit deposit ratio pawh 10.38% a ni.

 Hawnna inkhawm hi Pu Laldampuia, MRB Head Office a Officer in a kaihruai a ni.

 Chief Minister hi Pu T.Sangkunga, MLA & Chairman, Mizoram Youth Commission leh Champhai DC Pi Juhi Mukherjee ten an tawiawm a ni.

Attachment

  • Loading attachment...